ირაკლი კობახიძე ევროპული პოლიტიკური გაერთიანების სამიტზე ევროპის საბჭოს გენერალურ მდივანს ალენ ბერსეს შეხვდა. მთავრობის ადმინისტრაციის ცნობით, "ქართულმა მხარემ შეშფოთება გამოხატა საერთაშორისო მექანიზმების პოლიტიკურად მოტივირებული მიზნებით გამოყენების მზარდ ტენდენციაზე და იმედი გამოთქვა, რომ ეს პრაქტიკა შეიცვლება".

"შეხვედრაზე ყურადღება გამახვილდა საქართველოსა და ევროპის საბჭოს შორის არსებულ ნაყოფიერ თანამშრომლობაზე".

მთავრობის მეთაურმა კიდევ ერთხელ დაადასტურა საქართველოს ხელისუფლების მზადყოფნა დიალოგისთვის და როგორც ორმხრივ, ისე მრავალმხრივ ფორმატებში კონსტრუქციული თანამშრომლობისთვის.

ქართულმა მხარემ შეშფოთება გამოხატა საერთაშორისო მექანიზმების პოლიტიკურად მოტივირებული მიზნებით გამოყენების მზარდ ტენდენციაზე და იმედი გამოთქვა, რომ ეს პრაქტიკა შეიცვლება.

ხაზგასმით აღინიშნა საქართველოს მთავრობის ერთგულება ფუნდამენტური თავისუფლებების დაცვის, დემოკრატიული რეფორმების განხორციელებისა და კანონის უზენაესობის უზრუნველყოფისადმი" — ნათქვამია მთავრობის ადმინისტრაციის მიერ გამოქვეყნებულ განცხადებაში.

შეგახსენებთ, სომხეთის დედაქალაქ ერევანში ევროპული პოლიტიკური გაერთიანების მე-8 სამიტი იმართება. შეხვედრის დევიზია "მომავლის შენება: ერთიანობა და სტაბილურობა ევროპაში."

48 ქვეყნის ლიდერი, მათ შორის ევროკავშირის 27 წევრი ქვეყნის წარმომადგენელი, დღეს, 4 მაისს, შეიკრიბა, რათა მნიშვნელოვანი პოლიტიკური საკითხები პირისპირ განიხილონ.