ცენტრალურმა საარჩევნო კომისიამ თავის ვებგვერდზე დაიწყო შემაჯამებელი ოქმების გამოქვეყნება, რომლებსაც საარჩევნო უბნებიდან იღებს. 22 ოქტომბრის 00:20 საათის მონაცემებით, თბილისიდან მხოლოდ ერთი ოქმია შესული - გლდანის მე-10 ოლქის 39-ე უბნიდან.

გლდანის მე-10 საარჩევნო უბნის შემაჯამებელი ოქმი

ფოტო: ცესკო

როგორც შედეგი აჩვენებს, ამ უბანზე მისული 600 ამომრჩევლიდან კახა კალაძეს მისცა ხმა 304-მა ამომრჩეველმა, 89 ამომრჩეველმა მხარი დაუჭირა დამოუკიდებელ კანდიდატ ალეკო ელისაშვილს, ხოლო 99 ამომრჩევლის ფავორიტი ენმ-ს კანდიდატი ზაალ უდუმაშვილი გახდა. რაც შეეხება ელენე ხოშტარიას ევროპული საქართველოდან, მან გლდანის მე-10 უბანზე 38 ხმა მიიღო. ერთი ხმა აქვს მიღებული ლეიბორისტ გიორგი გუგავას.

რაც შეეხება მაჟორიტარულ და საკრებულოს პროპორციულ მონაცემებს, ძირითადად, ქართული ოცნება ლიდერობს. არის უბნები, სადაც მმართველი პარტია ოპოზიციას რამდენიმე ასეული ხმით უსწრებს და ეს სხვაობა განსაკუთრებით თვალშისაცემია რეგიონებიდან მიღებულ ოქმებში.