უკრაინის პრეზიდენტმა, ვოლოდიმირ ზელენსკიმ, 2 მაისით დათარიღებული განკარგულებით, სანქციების დაწესების შესახებ ეროვნული უსაფრთხოებისა და თავდაცვის საბჭოს გადაწყვეტილება აამოქმედა. დასანქცირებული პირებიდან ერთ-ერთი რუსეთის სპორტული ჭიდაობის ფედერაციის პრეზიდენტი მიხაილ მამიაშვილია. ინფორმაციას უკრაინული მედია ავრცელებს.

სასანქციო სიაში ხუთი ფიზიკური პირია შეყვანილი, მათ შორის ასევე არის 1976 წლის 3 დეკემბერს დაბადებული უკრაინის მოქალაქე ანდრი იოსიპოვიჩ ბოჰდანი. ეს მონაცემები ზუსტად ემთხვევა პრეზიდენტის ადმინისტრაციის ყოფილი ხელმძღვანელის პერსონალურ ინფორმაციას.

ზელენსკის ვებგვერდზე გამოქვეყნებული განცხადების თანახმად, სიაში მყოფი პირების ქმედებები "საფრთხეს უქმნის უკრაინის ეროვნულ ინტერესებს, უსაფრთხოებას, სუვერენიტეტსა და ტერიტორიულ მთლიანობას".

პრესსამსახურის ცნობით, სანქციები რამდენიმე პირს დაუწესდა.

"სანქციები ეხება უკრაინელ იურისტ ანდრი ბოჰდანს; უკრაინელ ბიზნესმენს, სანქცირებული ვიქტორ მედვედჩუკის პარტნიორსა და თანამზრახველს, ბოჰდან პუკიშს; რუს ბიზნესმენ ალან კირიუხინს, სანქცირებული საგადახდო სისტემა A7A5-ის საკვანძო მენეჯერს; ასევე, რუსული ოლიმპიური სპორტის ფუნქციონერებსა და პროპაგანდისტებს, სტანისლავ პოზდნიაკოვსა და მიხაილ მამიაშვილს", — განმარტა პრესსამსახურმა.

შემზღუდველი ზომები მოიცავს უკრაინის სახელმწიფო ჯილდოების ჩამორთმევას, აქტივების გაყინვას, სავაჭრო ოპერაციების შეჩერებას, უკრაინიდან კაპიტალის გატანის აღკვეთას, ლიცენზიებისა და ნებართვების შეჩერებას ან გაუქმებას, ასევე სახელმწიფო ქონების პრივატიზაციაში ან იჯარით აღებაში მონაწილეობის აკრძალვას.

სანქციები დაწესებულია 10 წლის ვადით, გარდა სახელმწიფო ჯილდოების ჩამორთმევისა, რაც უვადოა.