შემოსავლების სამსახურის ხელმძღვანელის პოსტზე ირაკლი (დაჩი) ბერაია მიხეილ მაღლაკელიძემ შეცვალა. ის შემოსავლების სამსახურის თანამშრომლებს ფინანსთა მინისტრმა, ლაშა ხუციშვილმა წარუდგინა. მაღლაკელიძეს ამ დრომდე ფინანსთა სამინისტროს საგამოძიებო სამსახურის უფროსის თანამდებობა ეკავა.

ფინანსთა სამინისტროს ცნობით, უწყებაში გამართულ შეხვედრას ესწრებოდა სამსახურის ყოფილი უფროსი ირაკლი (დაჩი) ბერაიაც. ლაშა ხუციშვილმა მას მადლობა გადაუხადა გაწეული სამსახურისთვის და წარმატებები უსურვა სახელმწიფო აუდიტის სამსახურის უფროსის პირველი მოადგილის თანამდებობაზე.

ლაშა ხუციშვილის თქმით, მიხეილ მაღლაკელიძე კარგად იცნობს შემოსავლების სამსახურის სისტემას, ვინაიდან მას წლების განმავლობაში უწყებაში სხვადასხვა თანამდებობა ეკავა.
ლაშა ხუციშვილმა ხაზი გაუსვა მის პროფესიონალიზმს და იმედი გამოთქვა, რომ მისი წარმატებული საქმიანობა გაგრძელდება ახალ სამსახურში მუშაობის პერიოდშიც.

ცნობისათვის, 27 აპრილს სამთავრობო ტელეკომპანია "იმედმა" გაავრცელა ინფორმაცია, რომ სახელმწიფო აუდიტის სამსახურის უფროსის პირველი მოადგილის პოსტზე ირაკლი (დაჩი) ბერაია დაინიშნა.

აღსანიშნავია, რომ ბერაიას კარიერული ცვლილებები გასული წლის განმავლობაში განსაკუთრებით დინამიკური იყო: ის 2025 წლის იანვრიდან ჯერ იუსტიციის მინისტრ ანრი ოხანაშვილის მოადგილის პოზიციას იკავებდა, იმავე წლის აპრილის დასაწყისში ფინანსთა სამინისტროს საგამოძიებო სამსახურის ხელმძღვანელად გადაინაცვლა, იმავე წლის ივნისიდან კი შემოსავლების სამსახურის უფროსის პოსტზე განაგრძო საქმიანობა.

შეგახსენებთ, აღმასრულებელ ხელისუფლებაში გადასვლამდე ირაკლი ბერაია იყო მე-9, მე-10 და მე-11 მოწვევის პარლამენტის წევრი ქართული ოცნებიდან.