ევროკავშირმა, 22 აპრილს, რუსეთის წინააღმდეგ სანქციების მე-20 პაკეტზე შეთანხმებას მიაღწია მას შემდეგ, რაც უნგრეთმა და სლოვაკეთმა ვეტო მოხსნეს. ამის შესახებ ინფორმაციას THE KYIV INDEPENDENT ავრცელებს.

სანქციების პაკეტის მიღება უნგრეთის მიერ იყო დაბლოკილი, რომელსაც აქამდე, პრემიერმინისტრი ვიქტორ ორბანი ხელმძღვანელობდა. მისი საარჩევნო მარცხის შემდეგ პროცესი განახლდა.

ევროკავშირის საბჭოში აცხადებენ, რომ პაკეტი საბოლოო დამტკიცებისთვის წერილობით პროცედურას გაივლის და გადაწყვეტილება უახლოეს პერიოდში გაფორმდება.

ამასთან, დღის განმავლობაში უნგრეთმა და სლოვაკეთმა განაცხადეს, რომ უკრაინამ აღადგინა ნავთობის ტრანზიტი "დრუჟბას" მილსადენით. დრუჟბას მილსადენი, რომელიც რუსულ ნავთობს აწვდის ამ ორ ქვეყანას, იანვრის ბოლოს რუსეთის თავდასხმის შედეგად დაზიანდა, რამაც ტრანზიტის შეჩერება გამოიწვია. სწორედ ამ საკითხის გამო ბუდაპეშტი სანქციებსა და ფინანსურ დახმარებას თებერვლიდან ბლოკავდა.

ახალი სანქციების პაკეტი, რომელიც ევროკომისიამ წარადგინა, მიზნად ისახავს რუსეთის ენერგეტიკული, ფინანსური და სავაჭრო სექტორების დამატებით შეზღუდვას. ასევე იგეგმება ე.წ. "ჩრდილოვანი ფლოტის" წინააღმდეგ ზომების გამკაცრებაც.

უკრაინის საგარეო საქმეთა მინისტრის, ანდრიი სიბიჰას განცხადებით, კიევი სანქციების კიდევ უფრო გაფართოებას ითხოვს.

"უკვე დიდი დრო გავიდა 24 თებერვლიდან. გაიზარდა როგორც ჩვენი გამოცდილება, ისე საჭიროება, რომ ზეწოლა გაძლიერდეს რუსეთის ინდუსტრიაზე, ჩრდილოვან ფლოტსა და საზღვაო სერვისებზე," — განაცხადა მან.