დღის ბოლოს სახლში დაბრუნებისას უცნაური დაღლა, ალბათ, ბევრჯერ გიგრძნია. განსაკუთრებულს რომ ვერაფერს იხსენებ — არც რთული საუბარი გქონია ვინმესთან, არც მაინცდამაინც დატვირთული სამუშაო, არც რამე კონკრეტული პრობლემა, მაგრამ მაინც, თითქოს რაღაც უხილავ ტვირთს დაატარებ. სხეული დაჭიმულია, ყურადღება გაფანტული და შენ იმის ახსნა გიჭირს, რეალურად რამ დაგღალა.

ასეთ დროს ხშირად საქმე “მეორად სტრესთან” გვაქვს — მდგომარეობასთან, როცა სხვისი ნერვიულობა ჩვენზე ისე მოქმედებს, ვერც კი ვიაზრებთ.

ფოტო: Pinterest

ჩვენი ტვინი მუდმივად აკვირდება გარემოს — გაუაზრებლად კითხულობს მიმიკებს, აკვირდება ხმის ტონს, მოძრაობის სისწრაფეს. თუ გვერდით ადამიანი დაძაბულია, სწრაფად ლაპარაკობს ან მოუსვენრად გრძნობს თავს, შენი ორგანიზმი ამას საფრთხის სიგნალად აღიქვამს. შედეგად, ჩვენც გვიჩქარდება გულისცემა და მოდუნებაც გვიჭირს.

განსაკუთრებით კარგად ეს დახურულ სივრცეებში იგრძნობა — ოფისში, სახლში, საზოგადოებრივ ტრანსპორტში. ერთი ადამიანის ნერვიულობა შეიძლება მთელ გარემოს მოედოს. ვიღაც ჩქარობს, ვიღაც ხმამაღლა საუბრობს, ვიღაც გაღიზიანებულია. რამდენიმე წუთში კი შენც ამ ემოციებს იმეორებ. არადა, თითქოს, შენს თავს არაფერი მომხდარა.

მეორადი სტრესი ხშირად შეუმჩნევლად გროვდება — არ არის ისეთი ცხადი, როგორც საკუთარი პრობლემებით გამოწვეული დაძაბულობა. თუმცა, დღის ბოლოს მაინც იჩენს ხოლმე თავს: კონცენტრაციაც იკლებს, გადაწყვეტილების მიღებაც რთულდება, ხანდახან უბრალოდ გაღიზიანებული ხარ ან სიმძიმეს გრძნობ. განსაკუთრებით მაშინ ძლიერდება ეს ეფექტი, თუ გადაღლილი ხარ. ამ დროს ტვინს ნაკლები რესურსი რჩება, რომ გაარჩიოს, თუ რომელია ჩვენი ემოცია და რომელი — სხვისი.

ფოტო: Pinterest

ამიტომ, საკუთარ თავზე ზრუნვა ზოგჯერ იმასაც ნიშნავს, შევამჩნიოთ — ეს ცუდად ყოფნა ნამდვილად ჩვენია თუ სხვისგან გადმოგვედო.

ამისთვის, ზოგჯერ, პატარა შესვენებაც საკმარისია ხოლმე: ღრმა ჩასუნთქვა, ოთახიდან გასვლა, ფანჯრის წინ დგომა და სივრცეზე დაკვირვება ან სულაც, კითხვის დასმა — ახლა რასაც ვგრძნობ, საიდან მოდის?

მეორადი სტრესის თავიდან სრულად აცილება თითქმის შეუძლებელია. ადამიანებს ერთმანეთთან განსაკუთრებული კავშირი გვაქვს, მათ შორის ემოციურიც. თუმცა, მისი ამოცნობა და იმის გააზრება, რომ დაძაბულობა შენ არ გიკავშირდება, უკვე შვებაა და მისი გაშვებაც უფრო მარტივია.