The Beatles-ის გულშემატკივრებისთვის ფანტასტიკური სიახლე გვაქვს. პოლ მაკარტნის ახალ ალბომში რინგო სტართან ერთად ჩაწერილი სიმღერა, სახელწოდებით Home To US, შევა.

Billboard-ის ცნობით, მაკარტნი თავის ახალ ალბომში, სახელწოდებით The Boys Of Dungeon Lane-ში, ლივერპულში გატარებული ახალგაზრდობის აქამდე უცნობ მოგონებებს გაგვიზიარებს.

ფოტო: Getty Images

როგორც ამბობენ, მაკარტნისა და სტარის დუეტს The Beatles-ის სიმღერების მსგავსი ჟღერადობა ექნება. აღსანიშნავია, რომ სიმღერის შექმნაში წვლილი შეიტანეს კრისი ჰაინდმა და შარლინ სპიტერმაც.

"რინგო ვნახე და ვუთხარი, რომ პროდიუსერ ენდრიუ უოტთან ერთად ვმუშაობდი", — თქვა პოლ მაკარტნიმ — "რინგო ენდრიუს სტუდიაში მოვიდა და ცოტა ხანს დრამზე დაუკრა"

ფოტო: The Rolling Stone

რაც შეეხება The Boys Of Dungeon Lane-ს, მაკარტნი გულწრფელ და სენტიმენტალურ ნამუშევარს გვთავაზობს. ახალ ალბომში მუსიკოსი მშობლებსა და ომისშემდგომ ლივერპულში გატარებულ ბავშვობას იხსენებს, ასევე ჯორჯ ჰარისონსა და ჯონ ლენონთან ერთად გადახდენილ თავგადასავლებზეც გვიყვება.

აღსანიშნავია, რომ ბოლო დროს მაკარტნი ხშირად საუბრობს The Beatles-ის შემდგომ პერიოდსა და Wings-ში გატარებულ წლებზე. მუსიკოსმა გასულ წელს გამოსცა წიგნი The Story Of A Band On The Run, რომელსაც მოჰყვა ანთოლოგიური კრებული და დოკუმენტური ფილმი Man On The Run. ხოლო, რინგო სტარი 24 აპრილს უშვებს თავის 22-ე სოლო ალბომს, სახელწოდებით Long Long Road.

ფოტო: John Pratt / Keystone / Getty

პოლ მაკარტნისა და რინგო სტარის დუეტი 2026 წლის 29 მაისს გამოვა.