მოძრაობა "ხმა" უფასო საკოლო კვების დასანერგად ხელმოწერების შეგროვებას იწყებს. ისინი საკანონმდებლო ინიციატივის წარდგენას აპირებენ, რასაც 25 000 ფიზიკური ხელმოწერა სჭირდება.

"მოძრაობა ხმა ვიწყებთ ხელმოწერების შეგროვებას უფასო საკოლო კვების დასანერგად და ამაში შენი მოკავშირეობა გვჭირდება!

საჭიროა 25 000 ფიზიკური ხელმოწერა საკანონმდებლო ინიციატივისთვის, რომლის მიზანია უფასო სასკოლო კვება ყველა საჯარო სკოლაში.

ხელმოწერების შეგროვება დაგეგმილი გვქონდა წელიწადზე მეტი ხნის წინ, როგორც უფასო სასკოლო კვების კამპანიის ლოგიკური გაგრძელება. მაგრამ ჩვენს ქვეყანაში შექმნილი პოლიტიკური და საზოგადოებრივი ვითარების გამო გადავიფიქრეთ, რასაც ვნანობთ.

დარწმუნებულები ვართ, რომ უნდა განვაახლოთ ის, რასაც თქვენთან ერთად წლები მივუძღვენით, რადგან საქართველოს სკოლებში ათიდან ექვსი ბავშვი მშიერია და წლიდან წლამდე სოციალური შემწეობის მიმღებ ბავშვთა რიგები ახალი ათასეულებით ივსება.

იმ წლებშიც, როდესაც ეკონომიკა ორნიშნა ზრდას აჩვენებს, სოციალური შემწეობის მიმღებთა რაოდენობა იზრდება, ისევე როგორც იმატებს ბავშვებში საკვების დანაკლისით გამოწვეული შერყეული ჯანმრთელობა, დამცირების განცდა, უთანასწორობა სკოლაში და სკოლის გარეთ.

ჩვენ არ გვინდა შეგაშინოთ, ჩვენ გვსურს, თქვენთან ერთად იმედიანი თვალი გავუსწოროთ რეალობას და მომავალს და თქვენთან ერთად ვიმოქმედოთ ნახევარი მილიონი ბავშვის გამოსაკვებად.

ჩვენ გვაქვს ერთად ბრძოლის გამოცდილება, მაგრამ ჩვენში ჯერ კიდევ სუსტია ერთად შენების და მომავლის ერთად წარმოდგენის გამოცდილება.

ყველა, ვინც ამ საერთო ეროვნული მნიშვნელობის საკითხის წამოწევაში მოკავშირეები ვიქნებით და მიზნისკენ ერთად ვივლით, შეგვიძლია დარწმუნებულები ვიყოთ, რომ ვხდებით დამოუკიდებელი საქართველოს ისტორიაში ყველაზე მასშტაბური პროგრესული საზოგადოებრივი პროცესის მონაწილე. ალბათ ისეთის, როგორიც უფასო სამედიცინო სისტემის დანერგვა იყო ომისშემდგომ დიდ ბრიტანეთში.
მაგრამ თუ თქვენ მხოლოდ პასიურ გულშემატკივრებად დარჩებით, არაფერი გამოვა.

შეავსეთ მოკავშირეობის ფორმა, რომ თქვენს ქალაქში თუ სოფელში მოკავშირედ გიგულოთ. გაუზიარეთ და შეავსებინეთ სხვებსაც.

და როდესაც ხელმოწერის ბლანკს ჩამოგიტანთ ან გაგიზიარებთ, წაიღეთ ის თქვენს სამსახურში, უნივერსიტეტში, უბანში, სამეზობლოში, სკოლაში საზოგადოებრივი თავშეყრის ადგილებში და შეაგროვეთ ხელმოწერები.

გააზიარეთ და იმოქმედეთ რწმენით, რომ ერთ ხელმოწერას 20 ბავშვის გამოკვება შეუძლია.

უფასო საკვები სკოლებს!"— წერს მოძრაობა "ხმა" სოციალურ ქსელში გავრცელებულ განცხადებაში და საზოგადოებას მოუწოდებს, შეავსოს მოკავშირეობის ფორმა.

შეგახსენებთ, მოძრაობა "ხმის" ორგანიზებით 2023 წელს, თბილისში "მარში შიმშილის წინააღმდეგ" გაიმართა. მარშის მთავარი მიზანი შიმშილთან ბრძოლა იყო, რაც, მათი თქმით, სკოლებში უფასო კვების დანერგვით უნდა დაწყებულიყო.