სულ ახლახან ზოოპარკში მცხოვრებმა მსოფლიოში ყველაზე ხანდაზმულმა გორილამ, ფატუმ, თავისი 69-ე დაბადების დღე აღნიშნა. ბერლინის ზოოპარკში მცხოვრები გორილას დაბადების დღის სუფრას ამშვენებდა ჩერი პომიდორი, ჭარხალი, პრასი და სალათის ფურცლები.

თუმცა, სადღესასწაულო მენიუში ტორტი არ ყოფილა, რადგან ხანდაზმული პრიმატის ჯანმრთელობისთვის შაქარი არ არის სასარგებლო.

ფოტო: AP

ფატუ მაშინდელ დასავლეთ ბერლინში ჯერ კიდევ 1959 წელს ჩაიყვანეს. იმ დროს მიიჩნევდნენ, რომ გორილა დაახლოებით 2 წლის იყო. მიუხედავად იმისა, რომ ფატუს დაბადების ზუსტი თარიღი უცნობია, მისი ოფიციალური დაბადების დღე 13 აპრილია.

აღსანიშნავია, რომ 2024 წელს, ფლამინგო ინგოს სიკვდილის შემდეგ, ფატუ ბერლინის ზოოპარკის ყველაზე ხანდაზმული ბინადარი გახდა. ამბობენ, რომ ფლამინგო სულ მცირე 75 წლის იყო, ის ზოოპარკში 1955 წლიდან ცხოვრობდა.

ფოტო: National Geographic

გინესის რეკორდების წიგნის ცნობით, ფატუ, სავარაუდოდ, დასავლეთ აფრიკის ველურ ბუნებაში დაიბადა. არსებობს ვარაუდი, რომ ფრანგმა მეზღვაურმა ის აფრიკიდან წაიყვანა და მარსელში, ბარის ვალის დასაფარად გადაცვალა. მოგვიანებით კი, გავრცელებული ინფორმაციით, ფრანგმა ცხოველებით მოვაჭრემ ფატუ ზოოპარკს მიჰყიდა.

ამჟამად ფატუ ცალკე ვოლიერში ცხოვრობს და ასაკის გამო ზოოპარკის სხვა გორილებთან დისტანციას ინარჩუნებს. მას კბილები აღარ აქვს, აწუხებს მსუბუქი ართრიტი და აქვს სმენის დაქვეითება.

ფოტო: AP

მიუხედავად ამისა, ბერლინის ზოოპარკის პრიმატების ზედამხედველის, ქრისტიან აუსტის თქმით, გორილა მომვლელების მიმართ მეგობრულია, თუმცა მაინც ჯიუტობს ხოლმე.