დედაქალაქში მუნიციპალური სასაფლაოების მიმართულებით, 12-13 აპრილს ავტობუსის ცხრა დროებითი მარშრუტი დაწესდება და აღნიშნული მარშრუტებით ორი დღის განმავლობაში მოქალაქეები უფასოდ ისარგებლებენ. ამის შესახებ თბილისის მერმა კახა კალაძემ მუნიციპალიტეტის მთავრობის სხდომაზე განაცხადა.

ავტობუსები მგზავრებს 08:00-დან 20:00 საათამდე მუხათგვერდის, ვაშლიჯვრის, კუკიის, ახალი კუკიის, მახათას, საბურთალოს, ღრმაღელის, ველისა და ვარკეთილის სასაფლაოების მიმართულებით გადაიყვანენ.

თბილისის მერიის ცნობით, საზოგადოებრივი ტრანსპორტის სპეციალური მარშრუტები იმოძრავებს მეტროსადგურებიდან:

"მარჯანიშვილი", "დელისი", "სარაჯიშვილი", "ვარკეთილის" მიმდებარე
ტერიტორიიდან, ასევე, "დიდუბის" ზედა გასასვლელიდან, სადგურის მოედნიდან
("თბილისი ცენტრალის" პირდაპირ), ბესარიონ ჭიჭინაძის ქუჩიდან (კორპუსი N25-ის
პირდაპირ) და ვარკეთილის III მასივიდან — შუამთისა და აბაშვილის ქუჩების გადაკვეთიდან.

კახა კალაძის განმარტებით, 11 აპრილის ღამეს თბილისის მეტრო გახანგრძლივებული დროით იმოძრავებს. 12-13 აპრილს კი ავტობუსების სპეციალური მარშრუტები დაინიშნება. მოქალაქეების შეუფერხებლად გადაადგილების მიზნით, მეტრო 12 აპრილის 04:00 საათამდე იმუშავებს და 11 აპრილის 23:00-დან 12 აპრილის 04:00 საათამდე მგზავრობა უფასო იქნება.