საქართველოს ახალგაზრდა იურისტთა ასოციაციამ აზერბაიჯანელი ჟურნალისტის, აფგან სადიგოვის საქართველოდან გაძევებასთან დაკავშირებით შეფასება გამოაქვეყნა. ორგანიზაციის განცხადებით, ეს ფაქტი ადამიანის უფლებათა ევროპული კონვენციისა და საქართველოს კანონმდებლობის მძიმე დარღვევაა, რომელიც პოლიტიკური ანგარიშსწორების ინსტრუმენტად გაოიყენეს.

საიას წერს, რომ სახელმწიფომ გვერდი აუარა ადამიანის უფლებათა ევროპული სასამართლოს მიერ 2025 წელს მიღებულ დროებით ღონისძიებას, რომლითაც საქართველოს, წამებისა და პოლიტიკური დევნის საფრთხის გამო, სადიგოვის აზერბაიჯანში ექსტრადიცია აეკრძალა.

საიას განმარტებით, მას შემდეგ, რაც აზერბაიჯანმა ექსტრადიციის მოთხოვნა გააუქმა, საქართველომ ექსტრადიციის აკრძალვის ასარიდებლად "გაძევების" მექანიზმი გამოიყენა. საია მიიჩნევს, რომ ეს არის საერთაშორისო ვალდებულებების შესრულებისთვის თავის არიდება და "კანონიერების ილუზიის" შექმნა.

ორგანიზაცია აღნიშნავს, რომ სადიგოვი 2026 წლის 4 აპრილს Facebook-პოსტის გამო დააკავეს, სადაც ის ზოგად კონტექსტში აკრიტიკებდა პოლიციას. საია ხაზს უსვამს, რომ ეს პოლიტიკური დისკურსის ნაწილია და არ წარმოადგენდა დაკავების კანონიერ საფუძველს.

საია წერს, რომ საქმის განხილვა კვირა დღეს, გამთენიისას (03:00-04:00 საათზე) ფორსირებულ რეჟიმში ჩატარდა, რისი ობიექტური საჭიროებაც არ არსებობდა. მოსამართლე თორნიკე ქოჩქიანმა სადიგოვს 2000-ლარიანი ჯარიმა, ქვეყნიდან გაძევება და შემოსვლის 3 წლით აკრძალვა შეუფარდა.

ორგანიზაცია აღნიშნავს, რომ ადმინისტრაციულ კოდექსში 2025 წლის ოქტომბრიდან შესული ცვლილებები (რომელიც ითვალისწინებს უცხოელის გაძევებას 173-ე მუხლით)რიტიკული აზრის ჩასახშობად პოლიტიკური ზეწოლის ინსტრუმენტად გამოიყენეს.

საიას დასკვნით, სახელმწიფომ ფაქტობრივად უგულებელყო ადამიანის სიცოცხლისა და უსაფრთხოების რისკები და ჟურნალისტი სამაგალითოდ დასაჯა.

საიას შეფასება ვრცლად წაიკითხეთ აქ.