შს მინისტრის გიორგი მღებრიშვილის განცხადებით, სამართალდამცავებმა ე.წ. კანონიერი ქურდი დავით გერლიანი დააკავეს:

"სამი დღის მანძილზე, უწყებამ გააზრებულად არ გააკეთა კომენტარი, რათა ხელი არ შეშლოდა საგამოძიებო მოქმედებებს. გერლიანი საქართველო-სომხეთის საზღვრის უკანონო გადაკვეთის მცდელობისას დააკავეს. დაკავებულის პირადი ჩხრეკისას ამოღებულია მის სახელზე გაცემული უკრაინის რესპუბლიკის პასპორტი".

შს მინისტრმა აღნიშნულის შესახებ, დღეს, 22 ივნისს, ბრიფინგზე ისაუბრა.

მინისტრის თქმით, 2016 წლის 19 ივნისს, შსს-მ გამოძიება საქართველოს სისხლის სამართლის კოდექსის 2231 მუხლის მეორე ნაწილით დაიწყო, რაც გულისხმობს ქურდული სამყაროს წევრობას ან კანონიერ ქურდობას.

19 მაისს, ნაციონალური მოძრაობის წევრმა გივი თარგამაძემ სპეციალურ ბრიფინგზე განაცხადა, რომ ე.წ. კანონიერმა ქურდმა, დავით გერლიანმა (დათო სვანი) საქართველოს საზღვარი ისე გადმოკვეთა, რომ არ დაუკავებიათ. მისი თქმით, გერლიანი უკრაინიდან, კერძოდ ოდესიდან იყო დეპორტირებული.

გიორგი მღებრიშვილის თქმით, მათ ოფიციალური წერილით მიმართეს უკრაინულ მხარეს, იმის შესახებ, იყო თუ არა დაკავებულის უკრაინული პასპორტი ავთენტური და თუ არა რატომ არ მოხდა მისთვის აღნიშნული პასპორტის ჩამორთმევა.

მღებრიშვილის განცხადებით, დაკავებულს 48 საათში წარედგინება ბრალი.