ორგანიზაცია WatchDog.MD-ის თავმჯდომარე ვალერიუ პაშას ცნობით, მოლდოვის პრორუსი ყოფილი პრეზიდენტი იგორ დოდონი და ოპოზიციონერი დეპუტატები საქართველოში იმყოფებიან. მისი თქმით, "მოლდოვასთან ურთიერთობების იმიტაციის მიზნით, ქართულმა მხარემ მოლდოვის პარლამენტიდან რუსი კონსერვატორების დელეგაცია მოიწვია".

მოლდოვა-საქართველოს მეგობრობის საპარლამენტო ჯგუფის საქართველოში ვიზიტის პროგრამას სწორედ WatchDog.MD-ის თავმჯდომარე ვალერიუ პაშა აქვეყნებს. ვიზიტის 1-5 აპრილს გაიმართება და მის ფარგლებში დაგეგმილია შეხვედრა მოლდოვის პარლამენტთან მეგობრობის ჯგუფის ხელმძღვანელ ისკო დასენთან.

"რა სირცხვილი და სრული იმედგაცრუებაა, თუ როგორ შეიცვალა საქართველო რუსი ოლიგარქის, ივანიშვილის ავტორიტარული მმართველობის ქვეშ! მოლდოვასთან ურთიერთობების იმიტაციის მიზნით, მათ მოლდოვას პარლამენტიდან რუსი კონსერვატორების დელეგაცია მოიწვიეს. მას ხელმძღვანელობს მოლდოვაში, შესაძლოა, ყველაზე ტოქსიკური კრემლის პროპაგანდისტი — ბოგდატ ტირდეა. წევრების უმრავლესობა აშკარად პრორუსი სოციალისტები არიან, დანარჩენევუ — კრემლის კონსერვატორები, რომლებიც პროევროპელებად ვითომ დემოკრატი კიშინიოვის პრო-კრემლის მერის და პოლიტიკური მეძავის, კოსტიუჩის პარტიიდან არიან", — წერს ვალერიუ პაშა.

საქართველოში ვიზიტის შესახებ წერს მოლდოვის პრორუსი ყოფილი პრეზიდენტი იგორ დოდონი. მისი განმარტებით მოლდოვას რესპუბლიკის პარლამენტის დელეგაციის ვიზიტი ქართული მხარის მოწვევით ხორციელდება.

დელეგაციას ხელმძღვანელობს მოლდოვა-საქართველოს მეგობრობის ჯგუფის თანათავმჯდომარე ბოგდან ტირდეა. დელეგაციაში ასევე შედიან საპარლამენტო ფრაქციის დემოკრატია სახლში თავმჯდომარე ვასილე კოსტიუკი; მოლდოვას სოციალისტური პარტიის წევრი პეტრუ ბურდუია და საპარლამენტო ფრაქციის ალტერნატიული თავმჯდომარის მოადგილე ოლგა ურსუ.

"ვიზიტის ფარგლებში, სავარაუდოდ, გაიმართება მოლდოვა-საქართველოს მეგობრობის ჯგუფის პირველი შეხვედრა, რაც ორ ქვეყანას შორის საპარლამენტთაშორისო დიალოგის გაძლიერებას აღნიშნავს. ასევე დაგეგმილია შეხვედრები საქართველოს პარლამენტის თავმჯდომარესთან და ყველა საპარლამენტო ფრაქციის წარმომადგენლებთან.

ვიზიტის მიზანია მოლდოვას რესპუბლიკასა და საქართველოს შორის თანამშრომლობის განვითარება და ურთიერთსასარგებლო სფეროებში, მათ შორის საპარლამენტო დონეზე, თანამშრომლობის ახალი შესაძლებლობების იდენტიფიცირება", — წერს იგორ დოდონი.

ცნობისათვის, საქართველოში ჩამოსვლამდე ის მოსკოვში იმყოფებოდა.