მამინაცვლის მხრიდან არასრულწლოვანზე სექსუალურ ძალადობაზე არასამთავრობო ორგანიზაცი "საფარმა" სტრასბურგში საქმე მოიგო. ამის შესახებ ინფორმაციას "საფარი" ავრცელებს. მათი ცნობით, ეს არის პირველი საქმე სექსუალური ძალადობის დანაშაულზე საქართველოში, სადაც სტრასბურგის სასამართლომ წამებისა და პირადი ცხოვრების მუხლების დარღვევა დაადგინა. "საფარი" ასევე წერს, რომ საქართველომ ეფექტურად ვერ გამოიძია არასრულწოვანის მიმართ მომხდარი სექსუალური ძალადობის შემთხვევა.

"მამინაცვლის მხრიდან არასრულწლოვანზე სექსუალურ ძალადობაზე საფარმა სტრასბურგში საქმე მოიგო.

ეს არის პირველი საქმე სექსუალური ძალადობის დანაშაულზე საქართველოში, სადაც სტრასბურგის სასამართლომ მე-3 (წამება) და მე-8 (პირადი ცხოვრება) მუხლების დარღვევა დაადგინა, ვინაიდან საქართველომ ეფექტურად ვერ გამოიძია არასრულწოვანის მიმართ მომხდარი სექსუალური ძალადობის შემთხვევა.

საქმის დეტალებზე, სისტემურ ხარვეზებსა და ამ გადაწყვეტილების მნიშვნელობაზე საფარი ვრცელ განცხადებას ხვალ პრესკონფერენციაზე გააკეთებს", — წერია "საფარის" მიერ გავრცელებულ ინფორმაციაში.

როგორც, "საფარის" ხელმძღვანელმა, ბაია პატარაიამ დღეს გამართულ პრესკონფერენციაზე განაცხადა დანაშაული 2021 წელს მოხდა, ხოლო მათ სტრასბურგის სასამართლოს 1 წლის შემდეგ მიმართეს.

"ძალიან მნიშვნელოვანი გადაწყვეტილება გამოიტანა გუშინ სტრასბურგის სასამართლომ. საქართველოსთვის ეს არის პირველი გადაწყვეტილება, რომელიც ეხება სექსუალურ ძალადობას და ამ შემთხვევაში ეს ძალადობა ხორციელდებოდა ბავშვზე. თვითონ ფაქტს 2021 წელს ჰქონდა ადგილი. ჩვენ ერთ წელიწადში მივმართეთ სტრასბურგის სასამართლოს და საკმაოდ დაჩქარებულ ვადებში განიხილა. სასამართლომ თქვა, რომ ასეთი გაჭიანურებული მართლმსაჯულება უკვე არღვევს ბავშვის უფლებებს და თქვა, რომ სტანდარტები, რომლითაც გამოძიება მუშაობს საქართველოში, არ შეესაბამება სტრასბურგის კონვენციის სტანდარტებს. აქვე უნდა ითქვას, რომ ამ ბავშვმა იმის მიუხედავად რომ ბევრი იბრძოლა, საქართველოში ვერ შეძლო თავისი სიმართლის დამტკიცება და რეალურად, მოუწია სტრასბურგისთვის მიმართვა, რომ არა ქალთა და ბავშვთა ორგანიზაციები, ისეთი, როგორიცაა საფარი, ეს ბავშვი საერთოდა დარჩებოდა ყოველგვარი მართლმსაჯულების მიღმა. სწორედ ამიტომ არის მნიშვნელოვანი არასამთავრობო ორგანიზაციების არსებობა. შეგახსენებთ, რომ საფარი ამ ეტაპზეც დაყადაღებულია და ჩვენ ძალიან შეზღუდული რესურსებით ვმუშაობთ, ამიტომ, კიდევ ერთხელ მოვუწოდებთ ხელისუფლებას, გადახედოს თავის პოლიტიკას და ყადაღა მოუხსნას საფარს და ხელი შეუწყოს ქალთა და ბავშვთა ორგანიზაციებს მუშაობაში", — განაცხადა ბაია პატარაიამ.

ადამიანის უფლებათა ევრპულმა სასამართლომ დაადგინა, არასრულწლოვნის მიმართ სექსუალური ძალადობის ბრალდებებზე ჩატარებული სისხლისსამართლებრივი გამოძიება არაეფექტიანი იყო და გამოიწვია მისი ხელახალი ვიქტიმიზაცია და საქართველოს სახელმწიფოს მომჩივანის სასარგებლოდ, არამატერიალური ზიანის კომპენსაციის მიზნით 10 000 ევროს გადახდა დააკისრა.