ამ დღეს ძალიან, ძალიან დიდხანს ველოდით — როგორც იქნა, HBO Max-მა ჰარი პოტერის სერიალის პირველი ტრეილერი გამოაქვეყნა. ორწუთიანი ვიდეო საკმაოდ სოლიდურ წარმოდგენას გვიქმნის ლეგენდარული ჯადოსნური სამყაროს მორიგ ეკრანიზაციაზე, რომლის გამოსვლასაც მსოფლიოში მილიონობით პოტერჰედი მოუთმენლად ელოდება.

ეს ხანგრძლივი მოლოდინი კი სულ რამდენიმე თვეში დასრულდება — ტრეილერის ბოლოს ვიგებთ, რომ ჰარი პოტერი და ფილოსოფიური ქვის პრემიერა დეკემბერში, საშობაოდ შედგება.

რაც შეეხება უშუალოდ ტრეილერს — მხოლოდ ეს ვიდეოც კმარა იმის დასტურად, რომ სერიალი ფილმებზე ბევრად მეტს გვიჩვენებს. ვიდეოში ჰარის თავდაპირველად მაგლების სამყაროში ვხედავთ, სადაც დეიდა პეტუნია თან თმას სჭრის და თან უმტკიცებს, რომ იგი ჩვეულებრივი ბიჭია და ასე მოქცევაც უნდა დაიწყოს. ჰარის თვალს ვავლებთ მაგლურ სკოლაშიც, სადაც მას დეიდაშვილი სხვებთან ერთად ჩაგრავს. თუმცა, იმ ერთი საოცარი წერილის შემდეგ კადრი პირდაპირ ჯადოსნურ სამყაროში გადადის და უკვე ჩვენს საყვარელ ჰაგრიდს ვხედავთ. მერე კი... აი, ამას ჰქვია შინ დაბრუნება — მონატრებული ჰოგვორტსი მთელი თავისი დიდებულებით წარმოგვიდგება: გამანაწილებელი ქუდით, მოძრავი კიბეებით, ქვიდიჩის მატჩებით და ერთადერთი და განუმეორებელი ალბუს დამბლდორით, რომლის როლშიც ჯონ ლითგოუს ვერც კი იცნობთ!

ჰარი პოტერის სერიალზე მუშაობის შესახებ ხმები წლების განმავლობაში ვრცელდებოდა, თუმცა, HBO Max-მა ეს ყველაფერი მხოლოდ 2023 წელს დაადასტურა. მაშინ გავიგეთ ისიც, რომ მასშტაბური პროექტი მთელ ათწლეულს გასტანს, პოტერიადის თითოეულ წიგნს კი სერიალის თითო სეზონი დაეთმობა. მუშაობის პროცესში აქტიურად არის ჩართული წიგნების ავტორი ჯოან როულინგიც, რომელსაც ამჯერად აღმასრულებელი პროდიუსერის როლი აქვს მორგებული.

რაც შეეხება შემოქმედებით გუნდს, სერიალზე Game of Thrones-ისა და The Last of Us-ის რეჟისორი, მარკ მაილოდი, მუშაობს. პროექტის შემოქმედებითი ხელმძღვანელი, სცენარისტი და ერთ-ერთი აღმასრულებელი პროდიუსერი კი ფრანჩესკა გარდინერი გახლავთ. გარდინერს აქამდე ისეთ გახმაურებულ სერიალებზე უმუშავია, როგორებიცაა Succession და Killing Eve.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…