პრეზიდენტი დონალდ ტრამპი აცხადებს, რომ კუბა კოლაფსის პირასაა და შესაძლოა აშშ-მა ეს კუნძულოვანი სახელმწიფო "აიღოს". ამის შესახებ ინფორმაციას POLITICO ავრცელებს.

მათი ცნობით, თეთრ სახლში ჟურნალისტებთან საუბრისას, ტრამპმა კუბის კომუნისტური ხელმძღვანელობის მისამართით ერთგვარი გაფრთხილება გააჟღერა. ეს განცხადება იმ ფონზე გაკეთდა, როდესაც ქვეყანა ღრმა ეკონომიკური კრიზისისა და ელექტროენერგიის საყოველთაო გათიშვის პირობებში იმყოფება.

პრეზიდენტმა აღნიშნა, რომ მას ექნება "კუბის აღების პატივი" და დასძინა, რომ ამ ქვეყანასთან მიმართებით "რასაც მოისურვებს, იმას გააკეთებს". კუბა საწვავის დეფიციტს მას შემდეგ განიცდის, რაც აშშ-მა ვენესუელა აიძულა, შეეწყვიტა კუნძულისთვის კრიტიკულად მნიშვნელოვანი მხარდაჭერა.

"ვფიქრობ, კუბა დასასრულს ხედავს... მთელი ცხოვრება მესმის შეერთებული შტატებისა და კუბის შესახებ. როდის იზამს ამას შეერთებული შტატები? მჯერა, რომ მე მექნება კუბის აღების პატივი", — განაცხადა მან.

კითხვაზე, თუ რას გულისხმობდა "აღებაში" (ქვეყნის, რომელსაც 1959 წლიდან კომუნისტური რეჟიმი მართავს), ტრამპმა მიანიშნა, რომ აშშ "რაიმე ფორმით" ჩაერევა.

"გავათავისუფლებ თუ ავიღებ — სიმართლე თუ გინდათ, ვფიქრობ, მასთან რაც მომესურვება, იმას ვიზამ. ისინი ახლა ძალიან დასუსტებული ერი არიან", — თქვა პრეზიდენტმა.

დონალდ ტრამპმა უფრო ადრე განაცხადა, რომ კუბის "მეგობრულად აღება" (friendly takeover) შესაძლებელი იყო.

POLITICO წერს, რომ აშშ-მა კუბაზე ზეწოლა იანვარში გააძლიერა, როდესაც ვენესუელის პრეზიდენტის, ნიკოლას მადუროს დაკავების ოპერაცია დაიწყო, რამაც კუნძულზე საბჭოთა კავშირის დაშლის შემდეგ ყველაზე მძიმე ეკონომიკური კრიზისი გამოიწვია. მადუროს ჩამოგდებამდე კუბა მნიშვნელოვნად იყო დამოკიდებული ვენესუელიდან საწვავის იმპორტზე.