ერთიანი ნაციონალური მოძრაობის ერთ-ერთი წევრი ლაშა ფარულავა სებ-ის პრეზიდენტის ნათია თურნავას განცხადებას გამოეხმაურა. მისი თქმით, თუ ნათია თურნავა ვერ ან არ უპირისპირდება პოლიტიკურ ზეწოლას, გადადგეს. მისივე განმარტებით, თურნავას მოვალეობა ხალხის ინტერესების დაცვა და მათი ფინანსური სტაბილურობის უზრუნველყოფაა.

"ნათია თურნავა 38 000 ლარის ანაზღაურებას არ იღებს სანქცირებული პირების დასაცავად. მისი მოვალეობა არის ხალხის ინტერესების დაცვა და ფინანსური სტაბილურობის უზრუნველყოფა. თუ იგი ვერ ან არ უპირისპირდება პოლიტიკურ ზეწოლას, მოვუწოდებთ გადადგეს.

ადრე ხელისუფლებამ დაიცვა ოთარ ფარცხალაძე, რომელიც საერთაშორისო სანქციების ქვეშ მოექცა, ხოლო ახლა იცავს იმ მედიასაშუალებებს, რომლებიც, რუსული ჰიბრიდული ომის ნარატივებს ავრცელებენ," — განაცხადა ლაშა ფარულავამ.

ცნობისთვის, სებ-ის პრეზიდენტმა, ნათია თურნავამ სამთავრობო პროპაგანდისტული ტელევიზიების "იმედისა" და "პოსტვ"-ის დასანქცირებასთან დაკავშირებით განაცხადა, რომ "თუკი წარმოიქმნება "კოლიზია" სხვა იურისდიქციაში მიღებულ ნორმატიულ აქტსა და საქართველოს კონსტიტუციასა და კანონმდებლობას შორის, მოქმედი კომერციული ბანკები ვალდებული არიან იმოქმედონ კონსტიტუციისა და კანონმდებლობით დადგენილი ნორმების შესაბამისად."

შეგახსენებთ, დიდმა ბრიტანეთმა "იმედი" და "პოსტვ" 24 თებერვალს დაასანქცირა.