ჯორჯ მარტინის ვესტეროსის სამყარო თეატრალურ სცენაზე ინაცვლებს. სპექტაკლის — სამეფო კარის თამაშები: შეშლილი მეფე — მსოფლიო პრემიერა 2026 წლის ზაფხულში, შექსპირის სამეფო დასის თეატრში შედგება.

რეჟისორი დომინიკ კუკი, რომელიც ამ პროექტზე რამდენიმე წელია დრამატურგ დუნკან მაკმილანთან ერთად მუშაობს, გვპირდება, რომ წინ ამაღელვებელი და მასშტაბური მომენტები გველის.

"ბუნებრივია, სიუჟეტი ბრძოლებით დატვირთულია, თუმცა ვცდილობთ, რომ ამ ყველაფრის გადმოსაცემად თეატრალური, კრეატიული გზა ვიპოვოთ," — ამბობს დომინიკი.

სპექტაკლი ჰარენჰალის ტურნირის გარშემო ვითარდება. ტურნირს ახალგაზრდა ნედ სტარკი, მისი და — ლიანა, ჯეიმი ლანისტერი და რობერტ ბარათეონი ესწრებიან.

ფოტო: HBO

"ეს არიან მთავარი გმირები, რომლებსაც მაყურებელი კარგად იცნობს, თუმცა სპექტაკლში ისინი გაცილებით ახალგაზრდები არიან," — განმარტავს კუკი. რეჟისორის თქმით, ზოგიერთ ისეთ პერსონაჟს, რომელიც სერიალში ცენტრალური ფიგურაა, სპექტაკლში ჯერჯერობით ეპიზოდური როლი აქვს.

რეჟისორის მიზანია, დადგას სპექტაკლი, რომელიც საინტერესო იქნება როგორც საგის ერთგული ფანებისთვის, ისე მათთვის, ვისაც სამეფო კარის თამაშების სამყაროზე წარმოდგენა არ აქვს.

ლიანა სტარკი შეშლილ მეფეში 16 წლის მოზარდია. "ის ბრწყინვალე მებრძოლია და საერთოდ არ ჯდება იმ ეპოქის ქალისთვის დადგენილ ჩარჩოებში. ლიანა ჭკვიანი და მეამბოხეა — თითქმის ისეთივე, როგორიც შექსპირის პერსონაჟები, ჟანა დ’არკი ან როზალინდი, არიან," — ამბობს კუკი.

მიუხედავად იმისა, რომ ლიანა რობერტ ბარათეონზეა დანიშნული, რეიგარ ტარგარიენსაც უახლოვდება: "მათი კავშირი გარკვეულწილად რომეო და ჯულიეტას ისტორიას ჰგავს". დუნკან მაკმილანის აზრით, ლიანა სტარკის გარეშე სამეფო კარის თამაშები საერთოდ არ იარსებებდა.

დანიელ ევანსი, დუნკან მაკმილანი, ჯორჯ მარტინი, თამარა ჰარვი და დომინიკ კუკი

ფოტო: Royal Shakespeare Company

სპექტაკლზე მუშაობისას, იმ დეტალების დასაზუსტებლად, რომლებიც წიგნებში გარკვევით არ იყო ახსნილი, მაკმილანი ჯორჯ მარტინთან თანამშრომლობდა:

ჯორჯი ჩვენს ხედვას ენდობა, თუმცა, ამავდროულად, თავის სამყაროსა და გმირებს ძალიან უფრთხილდება

თავად ჯორჯ მარტინი შექსპირის დიდი თაყვანისმცემელია. კუკის თქმით, მარტინს სწორედ ის იდეა ხიბლავს, რომ მისი ისტორია შექსპირისეული ტრაგედიების სტილში ადაპტირდება.

ჯორჯ მარტინი

ფოტო: Royal Shakespeare Company

ამჟამად სპექტაკლის მსახიობების შესარჩევად კასთინგი მიმდინარეობს. ერთ-ერთი ყველაზე რთული ამოცანა ლიანა სტარკის როლის შემსრულებლის პოვნაა.

როგორც დომინიკ კუკი ამბობს, სპექტაკლი მოგვიყვება ამბავს პიროვნებად ჩამოყალიბებაზე.

იხილეთ: ტესტი: Game of Thrones-ის რომელი პერსონაჟი ხარ?