პარიზის სააპელაციო სასამართლომ ნამახვანჰესის დავაზე მნიშვნელოვანი გადაწყვეტილება მიიღო: მან ძალაში დატოვა საერთაშორისო არბიტრაჟის განჩინება, რომლითაც საქართველოს კომპანია "ენკას (Enka Renewables LLC) სასარგებლოდ 400 მილიონი დოლარის გადახდა დაეკისრა, თუმცა, ქართული მხარის არგუმენტების საფუძველზე, ამ თანხის ამოღება დროებით შეაჩერა.

სასამართლომ გაიზიარა საქართველოს პოზიცია, რომ ასეთი სოლიდური თანხის დაუყოვნებლივი გადახდა სახელმწიფო ბიუჯეტს მძიმე ტვირთად დააწვებოდა და საფრთხეს შეუქმნიდა ქვეყნის სასიცოცხლო ფუნქციების შესრულებას. შესაბამისად, აღსრულების პროცესი გაყინულია იქამდე, სანამ პარიზის სასამართლო საქმეზე საბოლოო ვერდიქტს არ გამოიტანს.

"სასამართლომ ასევე გაითვალისწინა, რომ Enka წარმოადგენდა სპეციალურად ამ პროექტისთვის შექმნილ კომპანიას და აღარ ახორციელებდა არსებით კომერციულ საქმიანობას ან არ ფლობდა მნიშვნელოვან აქტივებს. შესაბამისად, არსებობდა რისკი, რომ თუ გადაწყვეტილება საბოლოოდ გაუქმდებოდა, უკვე გადახდილი თანხის დაბრუნება რთული ან შეუძლებელი იქნებოდა", — წერია გადაწყვეტილებაში.

შეგახსენებთ, რომ საქართველოში რეგისტრირებულმა და თურქული საინჟინრო ჯგუფის შემადგენლობაში შემავალმა საპროექტო კომპანია Enka Renewables LLC-მ (Enka) 2019 წელს საქართველოსთან $800 მილიონის ღირებულების ნამახვანის ჰიდროელექტროსადგურის პროექტისთვის შეთანხმება გააფორმა.

ადგილობრივი თემებისა და გარემოსდაცვითი ჯგუფების ფართომასშტაბიანმა პროტესტმა პროექტი ჩაშალა და Enka-მ 2021 წელს შეთანხმება შეწყვიტა.

2022 წელს Enka-მ საარბიტრაჟო დავა დაიწყო და პროექტის შეწყვეტისთვის კომპენსაციას მოითხოვდა. 2024 წელს არბიტრაჟმა გადაწყვეტილება გამოიტანა და საქართველოს $400 000-ის გადახდა დააკისრა.

ამის შემდეგ Enka-მ პარიზის სააპელაციო სასამართლოს გადაწყვეტილების აღიარებისა და საფრანგეთში მისი აღსრულების ნებართვის მისაღებად მიმართა. საქართველომ გაასაჩივრა ეს გადაწყვეტილება გაუქმების მოთხოვნით და ამავდროულად მოითხოვა აღსრულების შეჩერება.

ლობისთვის — სუბარი