ეკონომიკის მინისტრი, ნათია თურნავა ამბობს, რომ მთავრობის ამოცანაა ნამახვანჰესის ინვესტორთან შეთახმება არბიტრაჟის გარეშე შედგეს. მინისტრის თქმით, სამუშაო ჯგუფებს შორის ორი შეხვედრა უკვე გაიმართა.

"ორი შეხვედრა შედგა ჩვენს შორის, სამუშაო ჯგუფები ხვდებოდნენ ერთმანეთს. ეს პროცესი გაგრძელდება, უახლოეს პერიოდში კიდევ იქნება შეხვდერები. ჩვენი ამოცანა არის, რომ ამ კომპანიასთან შეთახმება მოხდეს ამა თუ იმ ფორმით, არბიტრაჟის გარეშე", — განაცხადა თურნავამ.

მინისტრი ამბობს, რომ ენკას მხრიდან სახეზეა შემხვედრი სურვილი, რათა მოხდეს შეთანხმება, თუმცა ამ ეტაპისთვის როგორც გაგრძელება, ისე ინვესტორის პროექტიდან გასვლა თანამბრად განიხილება.

"ჩვენ ვხედავთ, რომ შემხვედრი სურვილიც სახეზეა, რომ არბიტრაჟის გარეშე თუ არის შესაძლებელი, რომ მოხდეს შეთანხმება. თანაბრად განიხილება ამ ეტაპზე, როგორც პროექტის გაგრძელება მათ მიერ, ასევე, პროექტიდან გასვლა მათი მხრიდან გარკვეული პირობებით, ორივე შემთხვევაში, ეს უნდა იყოს ჩვენი ეკონომიკისა და ქვეყნის სასარგებლოდ მიღებული გადაწყვიტა. ამაზე ვმუშაობთ იუსტიციის სამინისტროსთან ერთად", — განაცხადა მინისტრმა.

22 სექტემბერს ცნობილი გახდა, რომ ნამახვანჰესის ინვესტორმა, ენკამ საქართველოს მთავრობასთან ხელშეკრულების გაწყვეტის გადაწყვეტილება მიიღო და მიზეზად კონტრაქტის პირობების დარღვევა დაასახელა.

ექსპერტების შეფასებით, თუ კომპანიასა და მთავრობას შორის საარბიტრაჟო დავა დაიწყება, ქვეყანას ასეულობით მილიონი დოლარის გადახდა მოუწევს.

ინვესტორის მხრიდან ხელშეკრულების გაწყვეტას წინ ჰესის მშენებლობის მოწინააღმდეგეთა პროტესტი უძღოდა. თავდაპირველად აქციები რიონის ხეობაში იმართებოდა, შემდეგ კი თბილისშიც. საბოლოოდ, მხარეებს შორის მედიაციის პროცესში ევროკავშირის ენერგეტიკული გაერთიანების წარმომადგენელი ჩაერთო, თუმცა ნამახვანჰესის მშენებლობის მოწინააღმდეგეებმა მედიაციის პროცესი დატოვეს.