ანჯელინა ჯოლის ცხოვრების ახალი ეტაპი ჰოლივუდისგან ძალიან შორს შეიძლება დაიწყოს.

People-ის ცნობით, ოსკაროსან მსახიობს დიდი ხანია, რაც ეს გადაწყვეტილება მიღებული აქვს, ხოლო ამ გეგმის სისრულეში მოსაყვანად ანჯელინა თავისი შვილების, ვივიენისა და ნოქსის, ზრდასრულ ასაკამდე მიღწევას ელოდება.

ანჯელინა ჯოლი შვილებთან ერთად

ფოტო: Getty Images

"ის საზღვარგარეთ რამდენიმე ადგილს განიხილავს", — ვკითხულობთ გამოცემაში —"ჯოლი ძალიან ბედნიერი იქნება, როცა ლოს-ანჯელესის დატოვებას შეძლებს".

როგორც თავად ანჯელინა ამბობს, მას სჭირდება სიმშვიდე, კონფიდენციალურობა და უსაფრთხოება. მსახიობმა ისიც დასძინა, რომ სწორედ ამ მიზეზების გამო ატარებს კამბოჯაში დიდ დროს.

"კამბოჯა იყო ქვეყანა, რომელმაც ლტოლვილების შესახებ საკითხები ღრმად გამაცნო", — განმარტა ჯოლიმ Vogue India-სთან ინტერვიუში — "ამ ყველაფერმა საგარეო საქმეებში ისე ჩამრთო, როგორც არასდროს და UNHCR-ში გამაწევრიანა კიდეც. უპირველეს ყოვლისა, ამ ქვეყნის წყალობით დედა გავხდი".

ფოტო: Neilson Barnard / Getty Images

რაც შეეხება ქვეყნის დატოვებას, ოსკაროსანმა მსახიობმა ამერიკის შეერთებული შტატების მდგომარეობა ჯერ კიდევ სექტემბერში, სან-სებასტიანის კინოფესტივალზე ყოფნისას გააკრიტიკა.

"მე მიყვარს ჩემი ქვეყანა, მაგრამ ამავდროულად ვერ ვცნობ მას", — თქვა ჯოლიმ პანელური დისკუსიის დროს.

მსახიობმა ისიც განაცხადა, რომ მისი მსოფლმხედველობა თანასწორობასა და ერთიანობას უკავშირდები, ხოლო ცხოვრება ისეთ ქვეყანაში, რომელიც ვინმეს პირად თავისუფლებასა და აზრის გამოხატვას ზღუდავს, ძალიან საშიშია.

ფოტო: Reuters

მან დასძინა: "ეს ძალიან, ძალიან რთული პერიოდია, რომელშიც ყველანი ერთად ვცხოვრობთ".

რაც შეეხება ჯოლის სამსახიობო კარიერას, აშშ-ის დატოვებასთან ერთად მას არაერთი გეგმა აქვს. მსახიობს წელს ფრანგი რეჟისორის, ალის ვონოკორის, ახალ ფილმში ვიხილავთ. გარდა ამისა, 2027 წელს მის ნახვას შევძლებთ დუგ ლიმანის ახალ თრილერსა და მარკ ფოსტერის Anxious People-ში. ხოლო 2028 წელს, ჯოლი კიდევ ერთხელ დაუბრუნდება ბოროტი ჯადოქრის როლს ფილმისთვის Maleficent 3.