ინსტაგრამზე ალბათ ერთხელ მაინც შეგხვედრიათ წყვილის ფოტო, რომელიც ფირუზისფერ ზღვაში კლდოვან თაღთანაა გადაღებული. ეს ადგილი, რომელსაც "შეყვარებულების თაღადაც" მოიხსენიებდნენ, იტალიის სანაპიროების ნამდვილი მარგალიტი და ტურისტების ერთ-ერთი საყვარელი ადგილი გახლდათ. თუმცა, ცოტა ხნის წინ, შტორმის შედეგად, თაღი ნანგრევების გროვად იქცა, ასე რომ, მარადიული სიყვარულის სიმბოლოდ მიჩნეული ადგილი ინსტაგრამის ზემოხსენებულ ფოტოებშიღა თუ გააგრძელებს არსებობას...

სამხრეთ იტალიაში, სალენტოს რეგიონში (ქვეყნის ჩექმისებრ რუკაზე "ქუსლის" ნაწილი), მდებარეობს ფარალიონი დი სანტ'ანდრეა, კირქვის კლდოვანი სანაპირო ადრიატიკის ზღვაზე, რომელიც საუკუნეების განმავლობაში გახლდათ რომანტიკის იტალიური სიმბოლო. ზღვისა და ქარის მუდმივი თავდასხმებით გამოკვეთილი თაღი, რომლის სახელსაც არაერთი ახლომდებარე სასტუმრო ატარებს, მე-18 საუკუნის ბოლოდან გამხდარა შეყვარებულების მოსალოცი ადგილი: წყვილები აქ ხან პირველ კოცნას ჩუქნიდნენ ერთმანეთს, ხანაც პირდაპირ თაღის ქვეშ სთხოვდნენ ხელს. ადგილობრივი ლეგენდის თანახმად, ვინც თაღის ქვეშ აკოცებდა გულისსწორს, მარადიულ სიყვარულს ეზიარებოდა.

თუმცა, თაღი იმდენად მყიფე გახლდათ, რომ მხოლოდ დროის ამბავი იყო, თავად როდის ეზიარებოდა გარდაუვალ აღსასრულს.

ფოტო 1: Getty Images / ფოტო 2: Shutterstock

კლიმატის კრიზისის შედეგად, ზღვაზე ტემპერატურა წლიდან წლამდე იწევს, ეს კი, თავის მხრივ, სანაპიროზე ამინდებს აუარესებს. ჩამონგრევამდე რამდენიმე კვირით ადრე, თაღი ციკლონმაც დააზიანა. ადგილობრივი ხელისუფლება ტურისტული ადგილის დასაცავად ზომების მიღებას წლებია, ცდილობდა. ორიოდე წლის წინ, $4,5 მილიონიც მოითხოვეს სანაპიროს ეროზიასთან საბრძოლველად, თუმცა, დაფინანსების მიღება ვერ მოხერხდა. ამდენად, ეს ტრაგედია გარდაუვალი იყო, უბრალოდ, არ ველოდით, ასე მალე თუ მოხდებოდაო, ამბობს დანგრეული თაღის მახლობელი ქალაქის, მელენდუნიოს, მერი მაურიციო ჩისტერნინო.

"ბუნებამ შექმნა ეს თაღი და მანვე წაიღო", — ამატებს ჩისტერნინო.

ბუნება, უფრო ზუსტად კი ზღვა, თავადვე მიხედავს ერთ დროს მეკობრეების სამეთვალყურეო საგუშაგოს, მერე კი სიყვარულის სიმბოლოდ ქცეული თაღის ნანგრევებს. ამის ყურება დაკრძალვას ჰგავსო, აცხადებს რეგიონის ტურიზმის საბჭოს წარმომადგენელი.

"ერთი სული მქონდა ხოლმე, როდის დავბრუნდებოდით", — ამბობს ადგილობრივი მცხოვრები ლორენცო ბარლატო, რომელმაც თავის ცოლს სწორედ ამ ადგილას სთხოვა ხელი 40 წელზე მეტი ხნის წინათ. მას შემდეგ წყვილი თაღს ქორწინების იუბილეებზე ხშირად სტუმრობდა, — "ახლა კი, სამწუხაროდ, მხოლოდ ლამაზი ფოტოებიღა შემომრჩა ამ სამოთხის მოსაგონებლად".