პლატფორმა "სალამ"-ი ე.წ განათლების რეფორმას სოციალურ ქსელში გამოეხმაურა. მათი განცხადებით, განხორციელებული ცვლილებების ფარგლებში ეთნიკური უმცირესობების წარმომადგენელთა განათლების ხელმისაწვდომობა კიდევ უფრო ბუნდოვანი და შეზღუდული ხდება და განსაკუთრებით საგანგაშოა ვითარება 1+4 პროგრამასთან მიმართებით. მათი თქმით, პროგრამის მონაწილეები "ამ დრომდე არ ფლობენ მკაფიო და ოფიციალურ ინფორმაციას ჩარიცხვის წესისა და პროცედურების შესახებ. გაურკვეველია, სად და რა ფორმით უნდა გააგრძელონ სწავლა." პლატფორმა ასევე აღნიშნავს, რომ განათლების სისტემაში ინკლუზიურობის შემცირება გააღრმავებს სოციალურ უთანასწორობას და დაასუსტებს საზოგადოებრივ ერთიანობას.

"პლატფორმა "სალამ"-ი შეშფოთებას გამოთქვამს ქვეყანაში მიმდინარე ე.წ. განათლების რეფორმასთან დაკავშირებით, რომლის ფარგლებში ეთნიკური უმცირესობების წარმომადგენელთა განათლების ხელმისაწვდომობა კიდევ უფრო ბუნდოვანი და შეზღუდული ხდება.

განსაკუთრებით საგანგაშოა ვითარება 1+4 პროგრამასთან მიმართებით. პროგრამის მონაწილეები, რომლებმაც წელს წარმატებით დაასრულეს მოსამზადებელი ეტაპი და უნდა ჩარიცხულიყვნენ კონკრეტულ ფაკულტეტებზე, ამ დრომდე არ ფლობენ მკაფიო და ოფიციალურ ინფორმაციას ჩარიცხვის წესისა და პროცედურების შესახებ. გაურკვეველია, სად და რა ფორმით უნდა გააგრძელონ სწავლა. ანალოგიურად, სრული ბუნდოვანებაა მომავალი ბენეფიციარებისათვის, არ არის ცნობილი, რა ფორმატით ჩატარდება მიღება, რა კრიტერიუმები იმოქმედებს და რა პირობებში შეძლებენ ისინი უმაღლეს განათლებაზე წვდომას.

ვამახვილებთ ყურადღებას, რომ ეთნიკური უმცირესობების წარმომადგენლები ისედაც არათანაბარ მდგომარეობაში იმყოფებიან განათლების სისტემაში. მათთვის ქართული ენის არასათანადო შესწავლა, გეოგრაფიული იზოლაცია, სოციალური და ეკონომიკური ფაქტორები დამატებით სირთულეებს ქმნის. სწორედ ამ რეალობის გათვალისწინებით შეიქმნა 1+4 პროგრამა, როგორც კომპენსირების მექანიზმი, რომელიც მიზნად ისახავდა უმცირესობების ინტეგრაციას და უმაღლეს განათლებაზე წვდომის გაზრდას.

განათლების უფლება არის ფუნდამენტური ადამიანის უფლება, რომელიც დაცულია როგორც საქართველოს კონსტიტუციით, ისე საერთაშორისო სამართლის ნორმებით. ეთნიკური ნიშნით არაპირდაპირი დისკრიმინაციის ნებისმიერი რისკი ეწინააღმდეგება თანასწორობის პრინციპს და ზიანს აყენებს ქვეყნის დემოკრატიულ განვითარებას.

დარწმუნებულნი ვართ, რომ განათლების სისტემაში ინკლუზიურობის შემცირება გააღრმავებს სოციალურ უთანასწორობას და დაასუსტებს საზოგადოებრივ ერთიანობას. სახელმწიფოს ვალდებულებაა, არა შეზღუდოს, არამედ გააძლიეროს ეთნიკური უმცირესობების განათლების ხელმისაწვდომობა და უზრუნველყოს მათთვის თანაბარი შესაძლებლობები", — წერია პლატფორმის განცხადებაში.

ცნობისთვის, გამარტივებული სისტემა, ე.წ. 1+4 პროგრამა ითვალისწინებს ზოგადი უნარების გამოცდის ჩაბარებას სომხურ აზერბაიჯანულ, აფხაზურ, ოსურ ენებზე და სათანადო ქულების დაგროვების შემთხვევაში უმაღლესი განათლების მიღების შესაძლებლობას.