ოცნების პარლამენტის თავმჯდომარემ ჟურნალისტებთან საუბრისას განაცხადა, რომ, ოკუპირებული აფხაზეთის გავლით, რუსეთსა და საქართველოს შორის სარკინიგზო მიმოსვლის აღდგენაზე რუსულ მხარეს მათთან საუბარი არ ჰქონია.

"არ ვიცი ვის ელაპარაკებიან, ჩვენ არ გველაპარაკებიან, შეიძლება ერთმანეთს ელაპარაკებიან. ...სარკინიგზო მიმოსვლა ოკუპირებულ ტერიტორიასთან რუსეთს ისედაც აქვს. აქ არაფერი ახალი არ არის. რაც შეეხება იმ ტერიტორიას, სადაც საქართველოს ხელისუფლების იურისდიქცია სრულად ხორციელდება, რა გგონიათ ახლა მატარებელი გაივლის ისე, რომ ჩვენ არავინ დაგვეკითხება? რა რისკებზე საუბრობთ? საკითხი მარტივია. ...ჩვენდა დაუკითხავად არაფერი არ მოხდება, რუსეთის ხელისუფლებისთვის ცნობილია დიდი ხანია, რა არის ჩვენი პოზიცია. ჩვენი პოზიცია არის ის, რომ ყველანაირი ურთიერთობები აღდგება, როცა რუსეთი აღიარებს საქართველოს ტერიტორიის მთლიანობას და მოხდება ჩვენი ტერიტორიების დეოკუპაცია. ...საქართველოს ხელისუფლებას ამ მხრივ არანაირი კომუნიკაცია არ აქვს. რაც შეეხება ურთიერთობების აღდგენას რუსეთის ფედერაციასთან, არის მარტივი წინაპირობა, ტერიტორიული მთლიანობის აღიარება არის მნიშვნელოვანი მომენტი, — განაცხადა შალვა პაპუაშვილმა.

მას შემდეგ, რაც რუსეთის ვიცეპრემიერმა, ალექსეი ოვერჩუკმა ისაუბრა რუსეთის გეგმებზე აღადგინოს საქართველოსთან სარკინიგზო მიმოსვლა ოკუპირებული აფხაზეთის გავლით, კრემლისტური პარტია "სოლიდარობა მშვიდობისთვის" ლიდერმა, მამუკა ფიფიამ სოციალურ ქსელში დაწერა, რომ ქართული "ჯავშანმატარებელი თბილისიდან მოსკოვში ჩავა და აუცილებლად აფხაზეთის გავლით!"

ოვერჩუკის თქმით, კავკასიაში ყველა დაზიანებული მარშრუტის განბლოკვის მიზნით მიმდინარეობს სამუშაოები და რუსეთიდან საქართველოსკენ აფხაზეთის გავლით მარშრუტის აღდგენა მნიშვნელოვანია რეგიონში "ტრანსპორტისა და ლოგისტიკური კავშირის გაძლიერებისთვის".

"ცნობილია რომ რუსეთის ვიცეპრემიერმა ალექსეი ოვერჩუკმა განაცხადა, რომ რუსეთი სომხეთთან რკინიგზის ორი მონაკვეთის აღდგენაზე მოლაპარაკებებს დაიწყებს. მან დასძინა, რომ ამ მონაკვეთების აღდგენით, რუსეთი თურქეთთან, ირანთან და აზერბაიჯანთან რკინიგზის მიმოსვლას გახსნის. მოსკოვი ასევე განიხილავს საქართველოსთან რკინიგზის მიმოსვლის აღდგენას აფხაზეთის გავლით.

ამიტომაც გავიმეორებ: ჩვენი ჯავშანმატარებელი, რომელიც თბილისიდან მოსკოვში ჩავა, უახლოეს მომავალში და აუცილებლად ჩამოვა აფხაზეთის გავლით!", — წერს პრორუსი მამუკა ფიფია.