"ამ ქვეყანაში, დღევანდელი ხელისუფლების პირობებში არ მოხდება არავისთვის ხელის გადაგრეხა, იქნება ისე, როგორც ამას კონსტიტუცია ითვალისწინებს... ყველაფერი ძალიან კარგად იქნება", — განაცხადა საქართველოს ტექნიკური უნივერსიტეტის რექტორმა, დავით გურგენიძემ განათლების სამინისტროში შეხვედრის შემდეგ სტუ-სა და თსუ-ის გაერთიანების შესახებ. მისი განმარტებით, ერთი წელია, რაც 19 უნივერსიტეტი და განათლების სამინისტროს განათლების რეფორმაზე მუშაობს. მისივე თქმით, მისთვის და ჯაბა სამუშიასთვის უნივერსიტეტების გაერთიანების შესახებ ცნობილი წინა დღეს გახდა.

"ჩვენ ვცხოვრობთ დემოკრატიულ ქვეყანაში. ამ ქვეყანაში, დღევანდელი ხელისუფლების პირობებში არ მოხდება არავისთვის ხელის გადაგრეხა, იქნება ისე, როგორც ამას კონსტიტუცია ითვალისწინებს. მე, როგორც რექტორს, პირადი აზრი, დიდი ხანია, მაქვს, მაგრამ არ მაქვს უფლება აზრის დაფიქსირების, ვიდრე ყველა მხარესთან არ მექნება საუბარი. ჩემს აზრს დავაფიქსირებ კოლეგებთან, შემდეგ კი — ქვეყნის პოლიტიკურ ხელმძღვანელობასთან. ერთი წელია, 19 უნივერსიტეტი და განათლების სამინისტრო ვმუშაობთ განათლების რეფორმაზე, რომელიც ძალიან ბევრ საკითხს მოიცავს, მაგრამ უნივერსიტეტის გაერთიანებაზე გადაწყვეტილება ჩემთვის და ჯაბა სამუშიასთვის ცნობილი წინა დღეს გახდა. მეორე დღეს, მინისტრთან შეთანხმებით, შევკრიბეთ პროფესორ-მასწავლებლები და გავაცანით ეს იდეები. მე და ჯაბა სამუშიამ ვიცით, რამხელა ტვირთი გვაქვს, გარწმუნებთ, ყველაფერი ძალიან კარგად იქნება", — განაცხადა გურგენიძემ.

შეგახსენებთ ოცნების ხელისუფლების ახალი საკანონმდებლო ინიციატივით, ივანე ჯავახიშვილს სახელობის თბილისის სახელმწიფო უნივერსიტეტი და საქართველოს ტექნიკურ უნივერსიტეტი გაერთიანდება. ამის შესახებ ბრიფინგზე ოცნების ხელისუფლების განათლების და მეცნიერების მინისტრმა გივი მიქანაძემ განაცხადა. მისი თქმით, ეს გადაწყვეტილება რექტორებთან წინასწარი კონსულტაციების საფუძველზე მიიღეს.

გივი მიქანაძის ბრძანებით შეიქნება მართვის დროებითი ორგანო — საბჭო და დაინიშნება რექტორის და რექტორის მოადგილეების მოვალეობის შემსრულებლები, რომლებიც რეორგანიზაციის პროცესს წარმართავენ.