შალვა პაპუაშვილი თსუ-ს და სტუ-ს გაერთიანებას ბრიფინგზე გამოეხმაურა. მისი თქმით, ერთი დიდი, ერთიანი უნივერსიტეტი იყო ივანე ჯავახიშვილის იდეა. ეს იყო მისი მიზანი, როცა თბილისის სახელმწიფო უნივერსიტეტს ქმნიდა. რაც შეეხება სტუდენტებს, მისი თქმით, მათთვის არაფერი შეიცვლება — ისინი იქნებიან ერთი დიდი უნივერსიტეტის სტუდენტები.

"უმაღლესი და ზოგადი განათლების რეფორმა ასეც დაანონსდა, რომ ეს იქნება ისტორიული რეფორმა საქართველოს განათლების, რომელიც თვისებრივად შეცვლის სასკოლო და უმაღლეს განათლებას საქართველოში. იმაზე კი არ ექნებათ საფიქრელი ჩვენს ახალგაზრდებს, რომ წავიდეს საზღვარგარეთ და როგორმე სხვაგან ისწავლოს, არამედ ადგილზე, საკუთარ საზოგადოებაში, მათთვის ნაცნობ სოციალურ გარემოში ექნებათ შესაძლებლობა, მიიღონ უმაღლესი სტანდარტის სასკოლო და უმაღლესი განათლება. ეს არის ის მიზანი, რომელიც ჩვენ დავპირდით ჩვენს ამომრჩევლებს, მოქალაქეებს და ამას მივაღწევთ აუცილებლად. სწორედ ამ მასშტაბების შესაბამისი არის ის გადაწყვეტილება, რომელიც გუშინ გახმოვანდა განათლების მინისტრის მხრიდან თსუ-სა და ტექნიკური უნივერსიტეტის გაერთიანებასთან დაკავშირებით. მინდა ორივე უნივერსიტეტის თითოეულ პროფესორს და სტუდენტს ჩემი პატივისცემა დავუდასტურო. ყველას, ვისაც შეიძლება ჰქონდეს გულწრფელი კითხვები ამ საკითხთან დაკავშირებით, ყველას, თითოეულ კითხვას პასუხი გაეცემა. ხედავთ, რომ განათლების მინისტრი ამ მხრივ აქტიური არის სხვადასხვა ჯგუფებთან შეხვედრის მხრივ, პრემიერმინისტრი პირადად არის ჩართული და ყველა კითხვას, თუკი რამე არსებობს, ამას პასუხი გაეცემა", — განაცხადა შალვა პაპუაშვილმა.

მისი თქმით, "ერთი დიდი, ერთიანი უნივერსიტეტი იყო ივანე ჯავახიშვილის იდეა".

"ვსაუბრობთ უმაღლესი განათლების თვისობრივ რეფორმაზე. ხომ გაიგეს ძირითადი კომპონენტები რა არის, თქვან, აბა, კომპეტენტური აზრი? და ერთადერთი აზრი რაც მოდის, რომ — შენობების გაყიდვა, შენობების გაყიდვა. არავისთვის მთავარი ამოცანა შენობების გაყიდვა, თუ გასხვისება არ არის. ჩვენი მთავარი არსი და აზრი არის ხარისხიანი განათლება. ერთი დიდი, ერთიანი უნივერსიტეტი იყო ივანე ჯავახიშვილის იდეა. ეს იყო მისი მიზანი, როცა თბილისის სახელმწიფო უნივერსიტეტს ქმნიდა. სახელმწიფო უნივერსტეტშივე შეიქმნა ტექნიკური მიმართულების ფაკულტეტი და შემდეგ უკვე ბოლშევიკების დროს როდესაც ივანე ჯავახიშვილი გამოაგდეს თსუ-დან, მიაბრუნეს და დაახვედროს ისეთი გარემო, რომ იქ მიბრუნებას გადაჰყვა საბოლოო ჯამში, შემდეგ შექმნეს ცალკე, დაყვეს დაანაწევრეს, იმისთვის, რომ მეტი კონტროლი ჰქონოდათ აკადემიურ პერსონალზე თუ ა.შ.

სინამდვილეში ყველა, ვინც კეთილსინდისიერად დაფიქრდება, ყველა მიხვდება, რომ ეს სასარგებლოა ორივე უნივერსიტეტისთვის იმიტომ, რომ ჩვენ ამით გვექნება თბილისის სახელმწიფო უნივერსიტეტი, ერთიანი უნივერსიტეტი, სადაც ამ მიმარულებების მიხედვით, როგორც ტექნიკური, ისე ჰუმანიტარული, იქნება უმაღლესი დონის განათლება", — განაცხადა შალვა პაპუაშვილმა.