"ბოლო პერიოდში განვითარებულმა მოვლენებმა აჩვენა, რომ დიალოგის გაგრძელება აკადემიურ სივრცეში აუცილებელია", — ამის შესახებ თბილისის სახელმწიფო უნივერსიტეტის რექტორმა, ჯაბა სამუშიამ თსუ-ისა და სტუ-ს გაერთიანებასთან დაკავშირებით, თსუ-ის მმართველი ორგანოების გაერთიანებულ სხდომაზე განაცხადა.

როგორც თსუ-ს მიერ გავრცელებულ ინფორმაციაშია აღნიშნული, სხდომის მონაწილეები ასევე შეჯერდნენ, რომ საკითხის მნიშვნელობიდან გამომდინარე მიზანშეწონილია შეხვედრა განათლების სამინისტროს წარმომადგენლებთან. ასევე, გამოითქვა მოსაზრება, რომ, თავის მხრივ, ფაკულტეტების მმართველი ორგანოები იმსჯელებენ აღნიშნულ საკითხზე და შეჯერებულ პოზიციას გააცნობენ თსუ-ს აკადემიურ საბჭოსა და სენატს.

თსუ-ს აკადემიური საბჭოს სხდომა 2 თებერვალს გაიმართა. ამის პარალელურად
თსუ-ს ეზოში სტუდენტებმა აქცია გამართეს. ისინი რექტორ ჯაბა სამუშიასთან შეხვედრას მოითხოვდნენ. აკადემიური საბჭოსა და სენატის გაერთიანებული სხდომის შემდეგ თსუ-ის რექტორი სტუდენტებსაც შეხვდა.

ცნობისთვის, ოცნების ხელისუფლების ახალი საკანონმდებლო ინიციატივით, ივანე ჯავახიშვილს სახელობის თბილისის სახელმწიფო უნივერსიტეტი და საქართველოს ტექნიკურ უნივერსიტეტი გაერთიანდება. ამის შესახებ 29 იანვარს, ბრიფინგზე ოცნების ხელისუფლების განათლების და მეცნიერების მინისტრმა გივი მიქანაძემ განაცხადა. მისი თქმით, ეს გადაწყვეტილება რექტორებთან წინასწარი კონსულტაციების საფუძველზე მიიღეს.

გივი მიქანაძის ბრძანებით შეიქნება მართვის დროებითი ორგანო — საბჭო და დაინიშნება რექტორის და რექტორის მოადგილეების მოვალეობის შემსრულებლები, რომლებიც რეორგანიზაციის პროცესს წარმართავენ.