ევროპული საქართველოს განცხადებით, გარდაბნის რაიონის სოფელ აღთაკლიაში პარტიის მაჟორიტარობის კანდიდატ ელშან კურბანოვს ქართული ოცნების კოორდინატორმა შარხმარდან გულიევმა პოლიტიკური საქმიანობის შეწყვეტა მოსთხოვა, წინააღმდეგ შემთხვევაში დაკავებით დაემუქრა.

მათივე თქმით, კურბანოვმა გულიევთან მეორე შეხვედრის აუდიო-ჩანაწერი გააკეთა:

"ჩანაწერში ნათლად ჩანს, რომ გულიევი საუბრობს დასაჭერი ადამიანების სიაზე, სადაც კურბანოვის გარდა სხვა მაჟორიტარი დეპუტატობის კანდიდატები და აქტივისტებიც არიან. პოლიტიკური საქმიანობის შეწყვეტის შემთხვევაში ქართული ოცნების კოორდინატორი კურბანოვს პარლამენტის წევრ გოდერძი ჩანქსელიანთან შეხვედრას და სამსახურის პოვნასაც ჰპირდება".

პარტიის თქმით, ევროპული საქართველოს დეპუტატობის კანდიდატს კურბანოვის გარდა გუშინვე დაუკავშირდა სავალან მირზოევის მამა, მირზა მირზოევი, რომელმაც მას პოლიტიკური აქტივობის შეწყვეტის შემთხვევაში სამსახური შესთავაზა:

"ევროპული საქართველოს კანდიდატებს მასიურად მთელ საქართველოში ემუქრებიან და კამპანიის შეწყვეტას სთხოვენ. სამწუხაროდ, სხვა შემთხვევებში თავად კანდიდატებმა შურისძიების შიშის გამო არ ისურვეს ამ ამბის გასაჯაროება".

პარტია სამართალდამცავებს მიმართავს და მოითხოვს, რომ დამნაშავეები დასაჯონ.