თბილისის საქალაქო სასამართლოში მყოფმა ძლიერი საქართველო - ლელოს წევრმა ალეკო ელისაშვილი დღევანდელ პროცესზე განაცხადა, რომ არ ჰქონდა განზრახული, რომ "საერთო საქმე დაეზიანებინა".

"ირაკლი [კუპრაძეს] თუ ფიქრობთ, რომ საერთო საქმე დავაზიანე ბოდიშით, ეგ განზრახვა არ მქონია ნამდვილად", — თქვა საქალაქო სასამართლოს დაწვის მცდელობისთვის ტერორიზმის მუხლით დაკავებულმა ალეკო ელისაშვილმა (ალეკო ელისაშვილის სიტყვას სასამართლოდან რადიო თავისუფლება ავრცელებს).

მანამდე "ლელო-ძლიერი საქართველოს" გენერალურმა მდივანმა, ირაკლი კუპრაძემ განაცხადა, რომ ალეკო ელისაშვილის "ქმედება პარტიულად მათთვის მიუღებელია, თუმცა ამის მიღმა ივანიშვილის რეჟიმი სასოწარკვეთაში აგდებს ადამიანებს და მათ სასოწარკვეთილი ქმედებისკენ უბიძგებს" და "ამ საკითხზე მასთან კომუნიკაცია არ ჰქონია".

"ალეკო ელისაშვილის შესახებ სამი რამ ვიცი: პირველი - ის რუსეთის რეჟიმისა და პუტინის მიერ ტერორიზმის მუხლით არის ძებნილი. მეორე - ის პატრიოტი მოქალაქეა და მესამე - მას საჯაროდ, კამერების წინ ნაცემი ჰყავს მამუკა მდინარაძე და როგორც „ქოცი“ სუბიექტი, არის ბოღმიანი და შურისმაძიებელი.

ჩვენ პროცესს ბოლომდე დავაკვირდებით და მივყვებით.

ჩვენ გვჭირდება ალეკოსგან მეტი კომუნიკაცია და დეტალების ცოდნა. ის ძებნილია რუსეთში ტერორიზმის ბრალდებით, ისევე როგორც აქ. ამის მიღმა ჩადენილი აქვს თუ არა რაიმე ტიპის ქმედება, ამას საქმე წარმოადგენს, მაგრამ ქმედება პარტიულად ჩვენთვის მიუღებელია, თუმცა ამის მიღმა ივანიშვილის რეჟიმი სასოწარკვეთაში აგდებს ადამიანებს და მათ სასოწარკვეთილი ქმედებისკენ უბიძგებს, თუ მისი ქმედება დადასტურდება.

მე მასთან კომუნიკაცია იმ დღეს, დაღამებამდე მქონდა, ოფისში. ჩვენ ამ საკითხზე კომუნიკაცია არ გვქონია", —განაცხადა ირაკლი კუპრაძემ.

ალეკო ელისაშვილი 29 ნოემბერს დააკავეს. შინაგან საქმეთა სამინისტროს ინფორმაციით, მან 29 ნოემბერს, დილით, თბილისის საქალაქო სასამართლოს კანცელარიის შენობის დაწვა სცადა.

პროკურატურამ ალეკო ელისაშვილს ბრალი გუშინ, 30 ნოემბერს წარუდგინა. უწყების მიერ გავრცელებულ ინფორმაციაში წერია, რომ პოლიტიკოსს ბრალი "თბილისის საქალაქო სასამართლოში ტერორისტული აქტის ჩადენის მცდელობის ფაქტზე" წარედგინა.

ელისაშვილი ფაქტს ადასტირებს, მაგრამ ბრალს არ აღიარებს.