დანიისა და გრენლანდიის მთავრობის მეთაურებმა აშშ-ის პრეზიდენტის, დონალდ ტრამპის კომენტარები გრენლანდიასთან დაკავშირებით გააკრიტიკეს, რომლებიც ვენესუელაში აშშ-ის სამხედრო ოპერაციის განხილვის ფონზე გაკეთდა.

კვირას, 4 იანვარს, პრემიერმინისტრებმა განაცხადეს, რომ ამერიკელი მოკავშირის მხრიდან ასეთი განცხადებები მიუღებელია.

"სრულიად უაზროა საუბარი აშშ-ის მიერ გრენლანდიის მიტაცებაზე. აშშ-ს არანაირი უფლება არ აქვს, ანექსია მოახდინოს დანიის სამეფოს შემადგენლობაში არსებული სამი ქვეყნის (დანია, გრენლანდია და ფარერის კუნძულები)", — ციტირებს Reuters დანიის პრემიერმინისტრ მეტე ფრედერიკსენის სიტყვებს.

მან მოუწოდა აშშ-ს, "შეწყვიტოს მუქარა ისტორიულად ახლო მოკავშირისა და სხვა ქვეყნისა და სხვა ხალხის წინააღმდეგ". მან გაიხსენა, რომ ვაშინგტონმა უკვე მიიღო პასუხი გრენლანდიისგან: "კუნძული არ იყიდება".

გრენლანდიის პრემიერმინისტრმა იენს-ფრედერიკ ნილსენმაც კვალვ გაიმეორა: "როდესაც აშშ-ის პრეზიდენტი ამბობს, რომ "გვჭირდება გრენლანდია" და გვაკავშირებს ვენესუელასთან და სამხედრო ჩარევასთან, ეს არა მხოლოდ არასწორია. ეს უპატივცემულობაა", — ციტირებს Reuters ნილსენის სიტყვებს.

მანამდე, ტრამპმა The Atlantic-ის ჟურნალისტ მაიკლ შერერთან საუბრისას განაცხადა, რომ ვენესუელა შესაძლოა არ იყოს უკანასკნელი ქვეყანა, სადაც ამერიკული ჩარევა განხორციელდება.

"ჩვენ გრენლანდია გვჭირდება, აბსოლუტურად", — თქვა ტრამპმა და დასძინა, რომ კუნძული "რუსული და ჩინური გემებითაა გარშემორტყმული". ამავდროულად, აშშ-ის პრეზიდენტმა განაცხადა, რომ "სხვებს მოუწევთ გადაწყვიტონ, რას ნიშნავს აშშ-ის სამხედრო მოქმედება ვენესუელაში გრენლანდიისთვის".

მაიკლ შერერის თქმით, ტრამპი აშშ-ის სახელმწიფო მდივანს, მარკო რუბიოს გულისხმობდა, რომელმაც ერთი დღით ადრე მოუწოდა ვენესუელაში აშშ-ის სამხედრო ოპერაციის ფონზე გრენლანდიაში არსებული ვითარებისადმი "ყურადღების" მიქცევისკენ და აღნიშნა, რომ ტრამპი "აგვარებს იმ პრობლემებს", რომლებზეც ის საუბრობდა.

"მარკომ გუშინ ძალიან გულუხვი იყო ჩემს მიმართ", — თქვა ტრამპმა. "იცით, მაშინ გრენლანდიაზე არ ვსაუბრობდი. მაგრამ გრენლანდია ნამდვილად გვჭირდება. თავდაცვისთვის გვჭირდება".

მარკო რუბიო არ იყო ერთადერთი, ვინც ტრამპის გრენლანდიასთან დაკავშირებულ ამბიციებზე მიუთითა. 4 იანვარს, ტრამპის ადმინისტრაციის უფროსის მოადგილის, სტივენ მილერის მეუღლემ, კეიტი მილერმა, სოციალურ ქსელ X-ზე გამოაქვეყნა კუნძულის რუკა აშშ-ის დროშის ფერებში. სურათის წარწერაში ეწერა: "მალე".

ეს ქმედება კოპენჰაგენში შეუმჩნეველი არ დარჩენილა.

"ჩემი ქვეყანა მოითხოვს დანიის ტერიტორიული მთლიანობის უპირობო პატივისცემას", — კომენტარი გააკეთა დანიის ელჩმა შეერთებულ შტატებში, იესპერ მიოლერ სორენსენმა, მილერის პოსტზე. მან განაცხადა, რომ დანია და შეერთებული შტატები "ახლო მოკავშირეები არიან და უნდა განაგრძონ ერთად მუშაობა".

გრენლანდია ავტონომიური რეგიონია დანიაში, რომელიც არქტიკაში მდებარეობს. მეორე საპრეზიდენტო ვადის დასაწყისიდან დონალდ ტრამპმა არაერთხელ გაუსვა ხაზი გრენლანდიის შეერთებულ შტატებთან ანექსიის გეგმებს "ეროვნული უსაფრთხოების მიზეზების გამო". 2025 წლის ბოლოს თეთრმა სახლმა გრენლანდიის საკითხებში სპეციალური წარმომადგენელი დანიშნა, რომელმაც პირობა დადო, რომ კუნძულის შეერთებულ შტატებში შეერთებაზე იმუშავებდა. ამ გადაწყვეტილებას როგორც დანია, ასევე გრენლანდია უარყოფითად რეაგირებდნენ.