Jacobs და Carte Noire საქართველოში ერთ-ერთი ყველაზე პოპულარული ყავის ბრენდებია. მოსახლეობის დიდი ნაწილი მათ ყოველდღიურად მოიხმარს და ისინი სასურსათო მარკეტებშიც ფართოდაა წარმოდგენილი. 2025 წლის ოქტომბერში სამართალდამცველმა უწყებებმა სწორედ აღნიშნული პროდუქციის ფალსიფიცირების ფაქტი გამოავლინეს.

კერძოდ, ჩატარებული გამოძიებით დადგინდა, რომ Jacobs Monarch 1.8 გ და Carte Noire 1.8 გ შეფუთვები მზადდებოდა თვითნებურად მოწყობილ საწყობში და ვრცელდებოდა როგორც ოფიციალური JDE Peet’s ბრენდების პროდუქცია, მიუხედავად იმისა, რომ არავითარი კავშირი არ ჰქონდა არც კომპანიის ხარისხის სტანდარტებთან და არც საწარმოო პროცესებთან.

აღნიშნულმა ფაქტმა მომხმარებელში ბუნებრივად გააჩინა კითხვები, ამჟამად მაღაზიის თაროებზე წარმოდგენილი ყავის ავთენტურობასთან დაკავშირებით. სწორედ ამიტომ, კომპანია JDE Peet’s-ში დეტალურად განმარტავენ, რა უნდა გაითვალისწინოს მომხმარებელმა Jacobs-სა და Carte Noire-ის ყავის შეძენისას და როგორ უნდა მოიქცნენ საეჭვო პროდუქტის აღმოჩენის შემთხვევაში.

ამასთან, კომპანიის დირექტორი კახაბერ მურაჩაშვილი საუბრობს ფალსიფიცირებული პროდუქციის მოხმარების რისკებთან და კომპანიისა და სახელმწიფოსთვის მიყენებულ ზიანთან დაკავშირებით:

ბატონო კახა, თავდაპირველად განგვიმარტეთ, როგორ უნდა დარწმუნდეს მომხმარებელი პროდუქტის ავთენტურობაში?

ყველაზე საიმედო განმასხვავებელი ნიშანი არის კანონმდებლობით გათვალისწინებული ქართული მარკირება. როგორც წესი, ყალბი პროდუქციის რეალიზატორები არ იცავენ აღნიშნულ წესებს და მათი ეტიკეტები ხშირად შეიცავს ორთოგრაფიულ შეცდომებს, არასწორ ინფორმაციას, მაგალითად, შენახვის პირობებთან დაკავშირებით, ასევე, არაზუსტ ან არალოგიკურ ვადას და სხვა. პროდუქტზე ვიზუალური დაკვირვებით შეამჩნევთ, არის თუ არა ის ავთენტური.

აქვე უნდა აღვნიშნოთ, რომ როგორც წესი, ყალბი პროდუქცია არის შედარებით დაბალი ფასის, რადგან მისი წარმოებისთვის გამოიყენება დაბალი ხარისხის, იაფი ნედლეული და ძირითადი ხარჯები მიმართულია შეფუთვისკენ, რათა მომხმარებელი სწორედ ვიზუალით შეაცდინონ. ამასთან, ფალსიფიკატორები თავიდან ირიდებენ გადასახადებს, დასაქმებულებთან დაკავშირებულ ხარჯებს, დადგენილი ხარისხის სტანდარტების დაცვას და აღნიშნულის ხარჯზე ახერხებენ ყალბი ყავის დაბალ ფასად რეალიზაციას.

თუ ვიზუალური დათვალიერების მიუხედავად მაინც რჩება ეჭვი, შეგიძლიათ, საკითხი დააფიქსიროთ ცხელ ხაზზე 0800 100 122 და ოპერატორი პროდუქტის წარმოების თარიღისა და სერიის ნომრის მიხედვით ჩვენი ოპერატორი მყისიერად მოგაწვდით ინფორმაციას. ამგვარად თავის დაზღვევით დაცული იქნება თქვენი და თქვენი ოჯახის წევრების ჯანმრთელობა და დარწმუნდებით, რომ ნამდვილად ხარისხიან და სერტიფიცირებულ პროდუქტს მოიხმართ.

როგორც აღნიშნეთ, ფალსიფიცირებულმა ყავამ შეიძლება ჯანმრთელობის რისკები შექმნას. საინტერესოა, რა საფრთხეებზეა საუბარი?

ყალბი პროდუქციის დამზადებისას შეიძლება ელემენტარული ჰიგიენური ნორმებიც კი არ იყოს დაცული და, ცხადია, შემადგენლობაში შეიძლება შედიოდეს ჯანმრთელობისთვის საფრთხისშემცველი ნივთიერებები. მათი მოხმარებით ვრისკავთ, რადგან რეალურად, არ ვიცით, რას ვაწვდით ჩვენს ორგანიზმს, რისკები კი იზრდება განსაკუთრებით მაშინ, როცა ყალბ პროდუქტს დღეში რამდენჯერმე, რეგულარულად მოვიხმართ.

აქვე ვისაუბროთ ფინანსურ ზარალზეც — მომხმარებელი თანხას იხდის ბრენდირებულ პროდუქტში, მაგრამ ვერ იღებს შესაბამის ხარისხსა და უსაფრთხოებას, რომლის გარანტიასაც ჩვენი კომპანია დაარსების დღიდან იძლევა.

რა ზიანს აყენებს პროდუქტების ფალსიფიცირება როგორც კომპანიას, ასევე სახელმწიფოს?

სამწუხაროდ, ასეთი ფაქტები ზიანს აყენებს ძლიერ კომპანიებს, რომლებიც რეალურად ცდილობენ, მომხმარებელს უმაღლესი ხარისხის, უსაფრთხო პროდუქცია შესთავაზონ.

ერთი მხრივ, ყალბი პროდუქცია ბიზნესებისთვის იწვევს ფინანსურ ზარალს, რეპუტაციულ რისკებსა და არასწორ კონკურენციას. სწორედ ამიტომ, ჩვენი მიზანია, მომხმარებელს დეტალური ინფორმაცია მივაწოდოთ, როგორ დაიცვას თავი ფალსიფიცირებული პროდუქციის შეძენისგან. მეორე მხრივ, უკანონო ვაჭრობა აზარალებს სახელმწიფოსაც, რადგან იწვევს საბიუჯეტო დანაკარგებს. აღარაფერს ვამბობ იმაზე, რომ იქმნება ასეთი მასშტაბური ფალსიფიკაციის პრეცედენტები, რამაც შეიძლება დანაშაული კიდევ უფრო წაახალისოს. სწორედ ამიტომ არის მნიშვნელოვანი დროული რეაგირება და ყალბი პროდუქციის რეალიზაციის აღკვეთა.

როგორც კომპანია, რომელიც საქართველოში უკვე ათეულობით წელია ოპერირებს, როგორ ფიქრობთ, როგორ შეიძლება შემცირდეს ყალბი პროდუქციის გავრცელება?

ყალბი პროდუქციის დამზადებისა და გავრცელების წინააღმდეგ ბრძოლისთვის გადამწყვეტ როლს ასრულებს კოორდინაცია სახელმწიფოს, ბიზნესებსა და მომხმარებლებს შორის. სწორედ ეს ჯაჭვი ქმნის დაცულ ბაზარს, რომელზეც ფალსიფიცირებული პროდუქციის მოხვედრის შანსი ძალიან მცირეა.

ამასთან, ჩრდილოვანი ეკონომიკის წინააღმდეგ ბრძოლა პირველ რიგში სახელმწიფოს ეკისრება. დიდი ფინანსური ზარალის თავიდან ასაცილებლად და დანაშაულებრივი საქმიანობის აღსაკვეთად მნიშვნელოვანია, სახელმწიფო უწყებებმა იზრუნონ ორგანიზებული ბაზრის გამყარებასა და სამართლიანი კონკურენციის უზრუნველყოფაზე.

რაც შეეხება უკვე ბიზნესის ნაწილს, ჩვენი მხრიდან მუდამ მზად ვართ შესაბამის ორგანოებთან აქტიურ თანამშრომლობაზე, ამასთან, სხვადასხვა არხით აქტიურად ვახორციელებთ მომხმარებელთა ინფორმირებას, რათა დავიცვათ მათი ჯანმრთელობა და ჩვენი, როგორც მაღალი პასუხისმგებლობის მქონე ბრენდის რეპუტაცია.