გაერთიანებული სამეფოს სახელმწიფო მინისტრი განვითარების საკითხებში, ბარონესა ჩაპმანი აცხადებს, რომ ბრიტანეთის მთავრობა შეშფოთებული რჩება საქართველოში დემოკრატიული უკუსვლით.

მისივე თქმით, ევროპისა და ჩრდილოეთ ამერიკის საკითხებში სახელმწიფო მინისტრმა, სტივენ დაუთიმ ეს საკითხები პირდაპირ 16 და 21 ოქტომბერს ქართული ოცნების საგარეო საქმეთა მინისტრ მაკა ბოჭორიშვილთან და ქართული ოცნების საგარეო საქმეთა მინისტრის პირველ მოადგილე გიორგი ზურაბაშვილთან განიხილა. აღსანიშნავია, რომ ამ შეხვედრების შესახებ ინფორმაცია ოცნების ხელისუფლების საგარეო უწყებას არ გაუვრცელებია.

"ჩვენ კვლავაც სერიოზულად შეშფოთებულები ვართ საქართველოში დემოკრატიული უკუსვლით, მათ შორის, სიტყვის თავისუფლების შეზღუდვითა და საპროტესტო აქციების საპოლიციო კონტროლით. ევროპისა და ჩრდილოეთ ამერიკის საკითხებში სახელმწიფო მინისტრმა ეს საკითხები პირდაპირ ქართული ოცნების საგარეო საქმეთა მინისტრ ბოჭორიშვილთან 16 ოქტომბერს და ქართული ოცნების საგარეო საქმეთა მინისტრის პირველ მოადგილე ზურაბაშვილთან 21 ოქტომბერს წამოჭრა.
დიდი ბრიტანეთი ასევე მხარს უჭერს ევროპის უსაფრთხოებისა და თანამშრომლობის ორგანიზაციასა და ევროპის საბჭოში საქართველოზე დემოკრატიული ნორმების დაცვისკენ მიმართულ ძალისხმევას", — აცხადებს ბარონესა ჩაპმანი.