ოცნების პარლამენტის თავმჯდომარე, შალვა პაპუაშვილი პოლონეთის მთავრობის ახალ დადგენილებას გამოეხმაურა, რომლის მიხედვითაც 2025 წლის 1-ელი დეკემბრიდან საქართველოს მოქალაქეებს პოლონეთში გამარტივებული გზით სამუშაო ვიზის მიღების საშუალება აღარ ექნებათ.

პაპუაშვილის განმარტებით, აღნიშნული ცვლილება, უპირველეს ყოვლისა, პოლონეთის ეკონომიკაზე იმოქმედებს უარყოფითად. მისივე თქმით, საქართველოსაც საკმაოდ მკაცრი მიგრაციის პოლირიკა აქვს და "ჩვენთან პოლონელიც ვერ ჩამოვა ასე ადვილად სამუშაოდ".

"ის, რომ პოლონეთის მთავრობა საკუთარი მიგრაციის პოლიტიკას ამკაცრებს ან ერთი, ან მეორე მიმართულებით "ქართული ოცნება" აქ რა შუაში არის, ხომ? ჩვენც საკმაოდ მკაცრი მიგრაციის პოლიტიკა გვაქვს და ჩვენთან პოლონელიც ვერ ჩამოვა ასე ადვილად სამუშაოდ. ასე რომ, ეს მათი შიდა მიგრაციის საკითხებია — როგორ აწესრიგებენ. ჩვენ ვხედავთ, რომ ზოგადად ამკაცრებს გერმანია, სხვა ქვეყნები... რაღაც ახალი ტალღა არის, რომ საკუთარი მიგრაციის პოლიტიკა გადააწყონ. საქართველოდან იქ სამუშაოს მაძიებელთა რაოდენობა იყო დიდი და შეხედეს იმ ქვეყნებს, საიდანაც დიდი არის და იქიდან უფრო მკაცრი რეგულაციები შემოიღეს... პოლონეთზე ექნება, უპირველეს ყოვლისა, ცუდი ეკონომიკური გავლენა. რადგან მუშახელი იქ ჩადიოდა, ეს ნიშნავს, რომ იქ იყო მოთხოვნა მუშახელზე. არ ვიცი, როგორ აპირებენ, რომ ეს მუშა ხელი დააკმაყოფილონ", — განაცხადა შალვა პაპუაშვილმა ტვ პირველთან საუბრისას.

ცნობისთვის, 2025 წლის 1-ელი დეკემბრიდან საქართველოს მოქალაქეებს პოლონეთში გამარტივებული გზით სამუშაო ვიზის მიღების საშუალება აღარ ექნებათ. ამის შესახებ პოლონეთის ოჯახის, შრომისა და სოციალური პოლიტიკის მინისტრის ახალ დადგენილებიდან ვიგებთ.

დოკუმენტში წერია, რომ 1-ელი დეკემბრიდან, გამარტივებული პროცედურები, მათ შორის უცხოელისთვის სამუშაოს მინდობის შესახებ განცხადება, შეეხებათ: სომხეთის, ბელარუსის, მოლდოვას და უკრაინის მოქალაქეებს. საქართველოს მოქალაქეები ამ სიიდანა მოიღეს. ახალი რეგულაცია საქართველოს მოქალაქეებისთვის გამონაკლისს ითვალისწინებს, მაგრამ მხოლოდ გარკვეული პირობებით.