"ოცნების" პარლამენტის ვიცესპიკერმა, ნინო წილოსანმა ევროკავშირის გაფართოების ფორუმზე საქართველოს არ მიწვევის შესახებ საუბრისას თქვა, რომ ფორუმზე საქართველოს არ მიწვევის მიზეზი საქართველოს "დასჯაა" იმისათვის, რომ "არაფორმალური მმართველებისთვის სასურველი პოლიტიკური, მოძალადეების დაჯგუფება ხელისუფლებაში ვერ მოდის".

"თუ ევროკავშირს გაფართოება რეალურად სურს, საქართველო ის უნიკალური შესაძლებლობების ქვეყანაა, რომელმაც წლების მანძილზე ბევრი გააკეთა, რომ კანდიდატ ქვეყნებს შორის საუკეთესო გამხდარიყო. ევროკავშირის მასშტაბით, სხვადასხვა მიმართულებით წამყვანი ყოფილიყო, მათ შორის ეკონომიკური ზრდით, კორუფციასთან ბრძოლით და ა.შ. იმ პირობებში, როცა საქართველო არ არის მიწვეული გარკვეულ ფორუმზე, ეს რით აიხსნება? წარმოუდგენელია. თუ ამ ფორუმის მიზანი ევროკავშირის გაფართოების საკითხებზე მუშაობა, მაშინ რატომ არ უნდა იყოს მიწვეული ქვეყანა, რომელიც რეფორმების გატარების და საუკეთესო პრინციპების დანერგვის ერთ-ერთი ფლაგმანია. ამ ყველაფერს მხოლოდ ერთი ახსნა აქვს, მიკერძოებული მიდგომა და საქართველოს პოლიტიკური დასჯის სურვილია. რისთვის ისჯება, საქართველო, ეს ნებისმიერმა ქართველმა იცის. წლებია, საქართველო იმის გამო ისჯება, რომ არაფორმალური მმართველებისთვის სასურველი პოლიტიკური, მოძალადეების დაჯგუფება ხელისუფლებაში ვერ მოდის. იმ პოლიტიკას ვერ ახორციელებენ, რომლის გატარებაც, თუნდაც 2022 წლის ომში სურდათ", — განაცხადა წილოსანმა.

დღეს ბრიუსელში ევროკავშირის გაფართოების ფორუმი გაიხსნა. მისი სლოგანია "კავშირის სრულყოფა და ჩვენი მომავლის უზრუნველყოფა" და აერთიანებს ფართო და მრავალფეროვან მონაწილეთა წრეს.

EU-ს გაფართოების ფორუმზე "ქართული ოცნება" მიწვეული არ არის

"ღონისძიება, რომელსაც გაფართოების საკითხებში ევროკავშირის კომისარი მარტა კოსი მასპინძლობს, იმ დროს ტარდება, როდესაც გაფართოებამ ახალი იმპულსი მოიპოვა, როგორც სტაბილურობის, კეთილდღეობისა და დემოკრატიული რეფორმების მამოძრავებელმა ძალამ მთელ კონტინენტზე.რუსეთის აგრესიულმა ომმა უკრაინის წინააღმდეგ ძალიან შეცვალა ევროპის გეოპოლიტიკური ლანდშაფტი, რაც ხაზს უსვამს იმას, რომ კავშირი უფრო ძლიერი, უფრო უსაფრთხო და უფრო კონკურენტუნარიანია, როდესაც ის ერთიანდება. პირველი თაობის შემდეგ, უფრო დიდი ევროკავშირის პერსპექტივა რეალურად ხელმისაწვდომი ხდება. ფორუმი გააერთიანებს მონაწილეთა ფართო და მრავალფეროვან სპექტრს სლოგანით "კავშირის დასრულება და ჩვენი მომავლის უზრუნველყოფა". დიალოგში ჩაერთვებიან ევროკავშირის, ეროვნული და რეგიონული ლიდერები, სამოქალაქო საზოგადოების წარმომადგენლები, მეწარმეები, ხელოვანები, ახალგაზრდული ხმები და პოლიტიკის ექსპერტები ევროკავშირის ინსტიტუტებიდან, წევრი სახელმწიფოებიდან და გაფართოების ქვეყნებიდან", — ნათქვამია გავრცელებულ პრესრელიზში.