პარტია ლიბერალებისა და დემოკრატების ალიანსი ევროპისთვის (ALDE) ოპოზიციის 8 ლიდერისთვის ბრალის დამძიმებას ეხმაურება და X-ზე განცხადებას ავრცელებს.

ALDE წერს, რომ საქართველოში "ოპოზიციის ხმები დაადუმეს". განცხადებაში ასევე ნათქვამია, რომ "ქართული ოცნების მმართველობის ქვეშ საქართველო სრულ ავტოკრატიაში ეშვება და მსოფლიო არ უნდა გაჩუმდეს".

"ოპოზიციის ხმები დაადუმეს. დემოკრატი ლიდერები "სახელმწიფოს წინააღმდეგ ჩადენილი დანაშაულებისთვის" სისხლისსამართლებრივ დევნას განიცდიან.

"ქართული ოცნების" მმართველობის ქვეშ საქართველო სრულ ავტოკრატიაში ეშვება და მსოფლიო არ უნდა გაჩუმდეს. დემოკრატია სრულმასშტაბიანი თავდასხმის ქვეშაა.

ევროპელი ლიბერალები ურყევ სოლიდარობას უცხადებენ საქართველოში თავისუფლების, დემოკრატიისა და ადამიანის უფლებებისთვის ყველა მებრძოლს", — ნათქვამია განცხადებაში.

შეგახსენებთ, რომ 6 ნოემბერს, პროკურატურაში გამართულ ბრიფინგზე ითქვა, რომ 8 ოპოზიციონერ პოლიტიკოსს — მიხეილ სააკაშვილს, გიორგი ვაშაძეს, ნიკა გვარამიას, ნიკანორ მელიას, ზურაბ გირჩი ჯაფარიძის, ელენე ხოშტარიას, მამუკა ხაზარაძეს და ბადრი ჯაფარიძეს ბრალი წარედგინათ შემდეგ ბრალდებებზე: სახელმწიფო საბოტაჟი, უცხო ქვეყნისათვის მტრულ საქმიანობაში დახმარება, საქართველოს კონსტიტუციური წყობილებისა და ეროვნული უშიშროების საფუძვლების წინააღმდეგ მიმართული საქმიანობის დაფინანსება და მოწოდება საქართველოს კონსტიტუციური წყობილების ძალადობით შეცვლისაკენ.