თბილისის ფინანსური სამიტის ფარგლებში, საქართველოს ეროვნული ბანკის ვიცე-პრეზიდენტმა ეკატერინე გალდავამ პანელურ დისკუსიაში მიიღო მონაწილეობა.

პანელზე, სახელწოდებით — საგადახდო სისტემების დაკავშირება: როგორ ხსნის ურთიერთთავსებადობა ფულის მოძრაობის მომავალს, განიხილეს საგადახდო ბარიერების მოხსნის შესაძლებლობები ღია, ურთიერთთავსებადი ინფრასტრუქტურის საშუალებით. ასევე ისაუბრეს, თუ როგორ უზრუნველყოფენ ციფრული აქტივები ფულის შეუფერხებელ მოძრაობას პლატფორმებსა და საზღვრებს შორის და რა არის საჭირო გადახდების მომავლისთვის.

სებ-ის ვიცე-პრეზიდენტთან ერთად დისკუსიაში მონაწილეობდნენ იზვან ალი, Nexus Global Payments-ის მრჩეველი და მახბუბა მუხამადიევა, Visa-ს კრიპტო გადაწყვეტილებების ხელმძღვანელი.

შეხვედრაზე ხაზი გაუსვეს საგადახდო სისტემების გაუმჯობესების აუცილებლობასა და გლობალური ეკოსისტემის შექმნის საჭიროებას, სადაც მეტად იქნება ერთმანეთთან დაკავშირებული სხვადასხვა ქვეყნის მყისიერი საგადახდო სისტემები.

ფოტო: საქართველოს ეროვნული ბანკი

როგორც ეროვნული ბანკის ვიცე-პრეზიდენტმა აღნიშნა, საქართველოსთვის უნაღდო ანგარიშსწორების განვითარება მეტად მნიშვნელოვანია. მიმდინარეობს დროის რეალურ რეჟიმში ანგარიშსწორების სისტემის (RTGS) განახლებისა და მყისიერი გადახდების სისტემების დანერგვის პროექტი. მისი შეფასებით, როგორც საერთაშორისო, ისე რეგიონალური თანამშრომლობა ამ პროცესში უმნიშვნელოვანესია.

ფოტო: საქართველოს ეროვნული ბანკი

ფოტო: საქართველოს ეროვნული ბანკი

“გლობალურ დონეზე თანამშრომლობის გაღრმავება არის გადახდების მომავლის ერთ-ერთი მთავარი გასაღები“, — აცხადებს ეკატერინე გალდავა.

პანელურ დისკუას მოდერატორობას უწევდა GFTN-ის ფორუმების აღმასრულებელი დირექტორი პატ პატელი.

თბილისის ფინანსურ სამიტს, რომელიც თბილისის აბრეშუმის გზის ფორუმის ფარგლებში გაიმართა, 50-ზე მეტი ქვეყნის წარმომადგენელი და 1 000-ზე მეტი დელეგატი ესწრებოდა.