ჟინვალის ჰიდროელექტროსადგური 40 წლის იუბილეს აღნიშნავს. ჰიდროკომპლექსის იუბილესთან დაკავშირებით, ჯორჯიან უოთერ ენდ ფაუერმა ვეტერანი თანამშრომლების დაჯილდოების ცერემონია გამართა. კომპანიამ მათ წლების განმავლობაში გაწეული თავდადებული შრომისა და პროფესიონალიზმისთვის მადლობის სიგელები გადასცა.

დღეს ჟინვალის ჰიდროკომპლექსი ქვეყნის წყალმომარაგების უმნიშვნელოვანესი ობიექტი და სიდიდით მეორე წყალსაცავია საქართველოში. კაშხლის სიმაღლე 102 მეტრია, ხოლო წყალსაცავის მოცულობა 520 მილიონ კუბურ მეტრს წარმოადგენს.

2008 წლიდან კომპლექსის ოპერირებას ჯორჯიან უოთერ ენდ ფაუერი ახორციელებს, რომელიც 2022 წლიდან უკვე ესპანური კომპანია Aqualia-ს მმართველობის ქვეშ არის. კომპანია მუდმივად ზრუნავს სისტემის უსაფრთხოებაზე, მართვისა და დაცვის ტექნოლოგიურ განახლებასა და ენერგოეფექტურობზე. განახლდა ძალოვანი დანადგარები, დაინერგა თანამედროვე მონიტორინგისა და ავტომატიზებული კონტროლის სისტემები.

“GWP-სა და Aqualia-სთვის ჟინვალის ჰიდროელექტროსადგური ერთ-ერთი ყველაზე მნიშვნელოვანი და სტრატეგიული აქტივია. ჩვენი ყურადღება და ძალისხმევა მის უსაფრთხო და ეფექტიანად მართვისკენ არის მიმართული და მუდმივად ვზრუნავთ სისტემის ტექნოლოგიურ განახლებაზე.

მინდა გულწრფელი მადლობა გადავუხადო ყველა იმ თანამშრომელს, ვინც ყოველდღიურად ზრუნავს ჟინვალის გამართულ ფუნქციონირებაზე. განსაკუთრებული მადლობა იმ ვეტერან თანამშრომლებს რომლებიც ჰიდროკომპლესის ამოქმედების დღიდან ერთგულად ემსახურებიან ჟინვალჰესს.”- ხოსე მიგელ სანტოსი, GWP-ის გენერალური დირექტორი.

ჟინვალის ისტორია მხოლოდ ტექნოლოგია არ არის — ეს ადამიანების ისტორიაა. იმ ადამიანების, რომლებმაც ობიექტის მშენებლობასა და ამოქმედებაში მონაწილეობა მიიღეს და დღემდე ერთგულად აგრძელებს მის მოვლას.