რუსეთში 2026 წლის მარტიდან "ორსული ქალებისა და ახალშობილების ერთიანი ფედერალური რეესტრი" ამოქმედდება. ამის შესახებ ინფორმაციას რუსული მედია ავრცელებს.

რეესტრში ყველა ორსულ ქალსა და მათი ორსულობის შედეგებზე იქნება ინფორმაცია. ორსული ქალების რეესტრში ასევე აისახება მონაცემები ახალშობილთა ჯანმრთელობის შესახებ. ამის შესახებ რუსეთის მთავრობის ვიცეპრემიერმა ტატიანა გოლიკოვამ სახელმწიფო დემოგრაფიული და ოჯახური პოლიტიკის განხორციელების საბჭოს პირველ სხდომაზე განაცხადა.

"მდგომარეობის მონიტორინგისთვის 2026 წლის 1 მარტიდან ამოქმედდება კონკრეტული დაავადებების ერთიანი ფედერალური რეესტრი. ის მოიცავს ყველა ორსული ქალის, მათი ორსულობის შედეგებისა და ახალშობილთა ჯანმრთელობის შესახებ ინფორმაციას," — განაცხადა გოლიკოვამ სახელმწიფო დემოგრაფიული და საოჯახო პოლიტიკის განხორციელების საბჭოს სხდომაზე.

რეესტრი უფრო ფართო სტრატეგიის ნაწილია, რომელიც მიზნად ქვეყნის დემოგრაფიული მდგომარეობის გაუმჯობესებას ისახავს.

რუსული მედიის ცნობით, ორსულთა რეესტრი იმ სისტემაში შევა, რომელიც სხვადასხვა დაავადების მქონე პაციენტების მონიტორინგს ითვალისწინებს. მიუხედავად იმისა, რომ ორსულობა დაავადებად ვერ ჩაითვლება, ის სისტემაში ცალკე პრიორიტეტად გამოიყოფა.

საბჭოს მუშაობაში მონაწილეობა რუსეთის პრეზიდენტმა ვლადიმირ პუტინმაც მიიღო. მისი თქმით, სახელმწიფომ ორსული ქალების დახმარების ზომები, როგორც უმაღლეს, ასევე საშუალო სასწავლებელშიც.

"შეიძლება ეს ადვილი არ იყოს, მაგრამ შესაძლებელია და აუცილებელია", — განაცხადა ვლადიმირ პუტინმა, თუმცა არ დაუკონკრეტებია, რას გულისხმობდა საშუალო განათლებაში: სკოლებს თუ კოლეჯებს.

ცნობისთვის, სპეციალისტების განმარტებით, 2025 წლის პირველ კვარტალში რუსეთში შობადობის მაჩვენებელი ბოლო ორი საუკუნის განმავლობაში ყველაზე დაბალ ნიშნულამდე დაეცა.