"ხალხის ძალის" თავმჯდომარე, დიმიტრი ხუნდაძე ყოფილი პრემიერმინისტრის, ირაკლი ღარიბაშვილისთვის ბრალის წარდგენას გამოეხმაურა.

მისი თქმით, სამშობლოს წინაშე პასუხისმგებლობა უფრო მეტია, ვიდრე პირადი ურთიერთობები

"კანონის წინაშე ყველა თანაბარი ვართ. სამწუხაროა, მაგრამ სამშობლოს წინაშე პასუხისმგებლობა უფრო მეტია, ვიდრე პირადი ურთიერთობები. გამოძიება გაგრძელდება. ალბათ, უფრო მეტი დეტალი იქნება ცნობილი. კანონს დაცვა სჭირდება და კანონი ყველგან იქნება დაცული. ჩემს ნათქვამში ემოციური, სამართლებრივი ნაწილი და ის პასუხისმგებლობაც სრულად გასაგებია, რასაც თავად მეც ვგრძნობ. რა თქმა უნდა, ემოციური კავშირი სამართლებრივი პასუხისმგებლობის ნაწილსაც გულისხმობს, როცა საქმე იმ თანამებრძოლს და თანაგუნდელს ეხება, რომელსაც მაღალი ნდობა ჰქონდა. კანონის დაცვა ყველგან საჭიროა.

პარლამენტს საკანონმდებლო დონეზე კანონმდებლობა საკმაოდ გამართული აქვს. სწორედ ამიტომ გახდა დაუშვებელი ის, რომ მაღალი თანამდებობის პირს ბიზნესი და შემოსავალი ჰქონდეს. ამ თვალსაზრისით, კანონმდებლობაში ხარვეზი არ არის, მაგრამ როცა ასეთი ფაქტი ხდება, რაც დაუშვებელი და მიუღებელია, ვფიქრობ, საზედამხედველო კონტროლი სადღაც გასააქტიურებელია. პროკურატურის მოთხოვნა რელევანტურია თუ არა, ამას სასამართლო გადაწყვეტს", — განაცხადა დიმიტრი ხუნდაძემ.

დღეს, პროკურატურაში გამართულ ბრიფინგზე, გენპროკურორმა გიორგი გვარაკიძემ განაცხადა, რომ ყოფილ თავდაცვის მინისტრსა და პრემიერმინისტრს, ირაკლი ღარიბაშვილს ბრალდება სსკ-ის 194 მუხლის მე-3 ნაწილი "გ" ქვეპუნქტით წარედგინა, რაც გულისხმობს უკანონო შემოსავლის ლეგალიზაციას, რასაც თან ახლავს განსაკუთრებით დიდი ოდენობით შემოსავლის მიღება.