ევროკავშირის წევრი ქვეყნების მუდმივმა წარმომადგენლებმა, უკრაინის წინააღმდეგ აგრესიული ომის გამო, რუსეთის წინააღმდეგ სანქციების მე-19 პაკეტი დაამტკიცეს. ეს გადაწყვეტილება ოთხშაბათს, 22 ოქტომბერს, ბრიუსელში ევროპული საბჭოს სხდომის წინ მიიღეს.

ცოტა ხნის წინ კი, ევროკავშირის საგარეო პოლიტიკის ხელმძღვანელმა, კაია კალასმა X-ზე დაწერა, რომ რუსეთის წინააღმდეგ სანქციების ხალი პაკეტი საბოლოოდ მიიღეს და ის მიმართულია რუსულ ბანკების, კრიპტობირჟების, ინდოეთისა და ჩინეთში არსებული ორგანიზაციების წინააღმდეგ. ამას გარდა, კალასის თქმით, "დესტაბილიზაციის მცდელობების წინააღმდეგ საბრძოლველად ევროკავშირი ზღუდავს რუსი დიპლომატების გადაადგილებას".

"ჩვენ ახლახან მივიღეთ სანქციების მე-19 პაკეტი.

ის მიმართულია რუსულ ბანკების, კრიპტობირჟების, ინდოეთისა და ჩინეთში არსებული ორგანიზაციების წინააღმდეგ.

დესტაბილიზაციის მცდელობების წინააღმდეგ საბრძოლველად ევროკავშირი ზღუდავს რუსი დიპლომატების გადაადგილებას.

პუტინისთვის ამ ომის დაფინანსება სულ უფრო და უფრო რთულდება", — წერს კაია კალასი.

მოსკოვის წინააღმდეგ ახალი შეზღუდვები ერთხმად დამტკიცდა. DW-ს ცნობით, სლოვაკეთი ერთ-ერთი ბოლო ქვეყანა იყო, რომელმაც სანქციების წინააღმდეგ გამოთქმული შენიშვნები უკან გაიწვია. ავსტრიამაც პირობა დადო, რომ პაკეტს არ დაბლოკავდა. გუშინ გამოცხადდა, რომ უნგრეთის პრემიერმინისტრ ვიქტორ ორბანს ევროპული საბჭოს სხდომაზე დააგვიანდებოდა და ხმის უფლებას სლოვაკეთის პრემიერმინისტრს, რობერტ ფიცოს გადასცემდა.

ევროკომისიამ სექტემბრის შუა რიცხვებში წარადგინა რუსეთის წინააღმდეგ სანქციების მე-19 პაკეტი. იგი მოიცავდა რუსეთიდან თხევადი ბუნებრივი აირის იმპორტის სრულ აკრძალვას 2027 წლის 1 იანვრიდან. გარდა ამისა, გაფართოვდა "ჩრდილოვანი ფლოტის" გემების სია. შეზღუდვები ასევე მოიცავს მესამე ქვეყნების კომპანიებს, რომლებიც ხელს უწყობენ რუსული ენერგორესურსებით ვაჭრობას სანქციების გვერდის ავლით, მათ შორის კრიპტოვალუტის საშუალებით.

ასევე, მოსალოდნელია, რომ ახალი შეზღუდვები აკრძალავს "როსნეფტთან" და "გაზპრომ ნეფტთან" ნებისმიერ ტრანზაქციას და რომ რუსული ნავთობის ფასის ჭერი შემცირდება.

მე-19 სანქციების პაკეტის მომზადებისას განიხილეს, რომ მათ ასევე შეეძლოთ გავლენა მოეხდინათ შენგენის ტურისტული ვიზების გაცემაზე რუსებისთვის. თუმცა, საბოლოოდ, სავიზო შეზღუდვები სიაში არ შევიდა.