ოცნების პრემიერი ირაკლი კობახიძე "ბათუმელებისა" და "ნეტგაზეთის" გამომცემლისა და დირექტორის, მზია ამაღლობელისთვის სახაროვის პრემიის მინიჭებას გამოეხმაურა. ის ამბობს, რომ "მზია ამაღლობელმა შეასრულა დავალება".

"მზია ამაღლობელმა შეასრულა დავალება. პირდაპირი იყო თუ არაპირდაპირი, ამას არ აქვს მნიშვნელობა, უცხოურ აგენტურას საქართველოში ჰქონდა დავალება, რომ მაქსიმალურად ეცადა, ჩვენი სამართალდამცავი სტრუქტურების დაკნინება, რასაც ვერ მიაღწიეს. მაგრამ, ვიღაცებს უფასებენ საკუთარ მცდელობას, ეს არის რეალურად, რასაც ვხედავთ. ეს არის რადიკალიზმის, კრიმინალის წახალისება, რაც ძალიან სამწუხაროა, თუმცა ვხედავთ რა მძიმე მდგომარეობაშია დღეს ევროპული ბიუროკრატია და ამ ფონზე ასეთი ფაქტები არავის უკვირს", — განაცხადა კობახიძემ.

"ბათუმელებისა" და "ნეტგაზეთის" დამფუძნებელსა და დირექტორს, მზია ამაღლობელს ევროკავშირის ადამიანის უფლებათა უმაღლესი ჯილდო — სახაროვის პრემია გადაეცა. ამაღლობელთან ერთად აღნიშნული პრემია ბელარუსმა ჟურნალისტმა, ანდჟეი პაჩობუტმაც მიიღო.

მზია ამაღლობელი პირველი ქართველია, ვინც სახაროვის პრემია მოიპოვა. პრემიის მფლობელებს შორისაა ნელსონ მანდელა, მალალა იუსაფზაი და ალექსეი ნავალნი.