"ოკუპანტი ქვეყნის მოქალაქეებს, რომლებიც სტუმრობენ ჩვენს ქვეყანას არ მოვემსახურებით, თუკი წერილობით არ დაადასტურებენ პატივისცემას ჩვენი და უკრაინის სუვერენიტეტის მიმართ", — ამის შესახებ სოციალურ ქსელში "რეფორმერ ფიტნესის" დირექტორი გიორგი ფუტკარაძე წერს.

მანამდე, 19 სექტემბერს, როდესაც ოკუპანტი ქვეყნის წარმომადგენელმა, ფიოდოროვ ალექსანდრე ალექსანდროვიჩმა სახლახო დამცველს, ლევან იოსელიანს საჩივრით მიმართა, სადაც წერდა, რომ "რეფორმერ ფიტნესს" მომსახურების შესაძენად ეწვია, თუმცა უარი უთხრეს. ლევან იოსელიანი გიორგი ფუტკარაძეს საჩივართან დაკავშირებით პოზიციის დაფიქსირებას 10 დღის ვადაში სთხოვს.

"მომსახურების მიღებისთვის, ადმინისტრატორმა მას ხელმოსაწერად დოკუმენტი გადასცა, რომელშიც მითითებული იყო ჩანაწერი საქართველოსა და უკრაინის ტერიტორიული მთლიანობის შესახებ. განმცხადებელმა დოკუმენტის ხელმოწერაზე უარი განაცხადა, რის გამოც მომსახურების მიღება ვერ შეძლო. იგი მიიჩნევს, რომ პოლიტიკური შეხედულების ნიშნით, დისკრიმინაციული მოპყრობის მსხვერპლია," – წერს სახალხო დამცველი.

"რეფორმერ ფიტნესის" დირექტორი გიორგი ფუტკარაძე სახალხო დამცველს სოციალურ ქსელში პასუხობს და წერს, რომ რუსეთის უკრაინაში შეჭრის პირველივე დღიდან საჯაროდ აქვთ გაცხადებული, რომ ოკუპანტი ქვეყნის მოქალაქეებს, რომლებიც სტუმრობენ საქართველოს არ მოემსახურებიან, თუ წერილობით არ დაადასტურებენ პატივისცემას საქართველოსა და უკრაინის სუვერენიტეტის მიმართ. ფუტკარაძე იმასაც წერს, რომ მათი კომპანია არც "საქართველოს საპოლიციო სისტემის თანამშრომლებს ემსახურება".

"ვინაიდან და რადგანაც კანონის ენით "საქართველოს სახალხო დამცველი" გქვიათ გადავწყვიტეთ, თქვენს #25/7686 წერილზე პასუხი გაცნობოთ სახალხოდ და არა შეტყობინებაში მითითებული ელექტრონული ფოსტის საშუალებით.

შეგიძლიათ აცნობოთ საჩივრის ავტორსაც.

ჩვენ, როგორც კერძო ბიზნესი და მესაკუთრე, უფლებამოსილი ვართ ავირჩიოთ სტუმრები სხვადასხვა კრიტერიუმის მიხედვით ისევე, როგორც მომხმარებელს აქვს უფლება აირჩიოს პროდუქტისა და მომსახურების მიმწოდებელი თავისი გემოვნებისა და კრიტერიუმების შესაბამისად.

რუსეთის უკრაინაში შეჭრის პირველივე დღიდან საჯაროდ გვაქვს გაცხადებული, რომ ოკუპანტი ქვეყნის მოქალაქეებს, რომლებიც სტუმრობენ ჩვენს ქვეყანას არ მოვემსახურებით, თუკი წერილობით არ დაადასტურებენ პატივისცემას ჩვენი და უკრაინის სუვერენიტეტის მიმართ. შეგიძლიათ იხილოთ აღნიშნული ბმულების საშუალებით ჩვენს სოციალურ პლატფორმებზე.

დამატებით გაცნობებთ, რომ ჩვენ ასევე არ ვემსახურებით საქართველოს საპოლიციო სისტემის თანამშრომლებს და აღნიშნულის მიზეზი და საჯარო განცხადებაც შეგიძლიათ იხილოთ თანდართული ბმულების საშუალებით.

არ არსებობს კანონი და ძალა, რომელიც გვაიძულებს მოვემსახუროთ ჩვენთვის არასასურველ სტუმრებს, ან არ მოვემსახუროთ ჩვენთვის სასურველ მომხმარებლებს (როგორც ამას პანდემიის დროს ვაკეთებდით).

თქვენ ამას დისკრიმინაციას უწოდებთ, სეგრეგაციას თუ სტიგმას საერთოდ არ გვაინტერესებს.

როგორც ჩანს თქვენ მიერ დადგენილი ვადაც შემომგვერღვა, მაგრამ ესეც არ გვაინტერესებს.

გირჩევთ, ასე ოპერატიულად და მონდომებით დაიცვათ საქართველოს მოქალაქეების უფლებები სისტემის წინაშე", — წერს სოციალურ ქსელში "რეფორმერ ფიტნესის" დირექტორი გიორგი ფუტკარაძე.