ეუთოს საპარლამენტო ასამბლეის სამხრეთ კავკასიის სპეციალურმა წარმომადგენელმა ლუის გრასამ (პორტუგალია) საქართველოში 4 ოქტომბრის ადგილობრივი არჩევნების დროს და მის შემდეგ განვითარებული მოვლენების, ასევე მთავრობის გადაყენების მცდელობებთან დაკავშირებული არეულობების გამო შეშფოთება გამოხატა. ამის შესახებ ინფორმაციას ეუთოს საპარლამენტო ასამბლეის (OSCE PA) გვერდზე ვკითხულობთ.

"ღრმად ვარ შეშფოთებული საქართველოში ადგილობრივი არჩევნების შემდეგ გამწვავებული დაძაბულობითა და ძალადობის შემთხვევებით," — განაცხადა სპეციალურმა წარმომადგენელმა, რომელმაც ეუთოს დემოკრატიული ინსტიტუტებისა და ადამიანის უფლებების ოფისის (ODIHR) ბოლო განცხადებას დაუჭირა მხარი.

მან საქართველოს ხელისუფლებას მოუწოდა სრულად დაიცვას მშვიდობიანი შეკრებისა და გამოხატვის თავისუფლების უფლებები და უზრუნველყოს, რომ სამოქალაქო საზოგადოება თავისუფლად და შიშის გარეშე მოქმედებდეს.

"ეუთოს საპარლამენტო ასამბლეა ხაზს უსვამს, რომ დემოკრატიული მმართველობა უნდა ეფუძნებოდეს კანონიერებას, ანგარიშვალდებულებას და მშვიდობიან პოლიტიკურ დიალოგს... ამ გადამწყვეტ მომენტში, მე მოვუწოდებ ყველა მხარეს, თავი შეიკავონ ნებისმიერი სახის ძალადობისგან და ყველა პოლიტიკურმა ძალამ იმოქმედოს მხოლოდ ლეგიტიმური პოლიტიკური პროცესების გზით", — განაცხადა გრასამ.

სპეციალურმა წარმომადგენელმა ეუთოს საპარლამენტო ასამბლეის 2025 წლის ივლისში მიღებული პორტოს დეკლარაცია გაიხსენა, სადაც ასამბლეამ შეშფოთება გამოხატა დემოკრატიული უკუსვლის, სამოქალაქო საზოგადოების და მედიის თავისუფლებების შეზღუდვისა და საქართველოს ევროპული მისწრაფებების ნამდვილი დემოკრატიული რეფორმებით დაცვის აუცილებლობის გამო.

"ეუთოს საპარლამენტო ასამბლეა კვლავ მტკიცედ უჭერს მხარს ყველა პოლიტიკურ აქტორსა და სამოქალაქო საზოგადოებას, მათი ძალისხმევის ფარგლებში — დეესკალაციის, დემოკრატიული ინსტიტუტების გაძლიერებისა და საზოგადოებრივი ნდობის აღდგენის მიმართულებით, დიალოგისა და ეუთოს ვალდებულებების დაცვის გზით," — თქვა გრასამ.

ეუთო/ოდირი: მოვუწოდებთ საქართველოს ხელისუფლებას პატივი სცენ მშვიდობიანი შეკრების თავისუფლებასა და ადამიანის უფლებებს