"დოჟდის" საინფორმაციო სამსახურის ხელმძღვანელს და ტელეწამყვანს, ეკატერინე კოტრიკაძეს რუსეთში პატიმრობა დაუსწრებლად შეუფარდეს — ამის შესახებ ინფორმაციას გამოცემა Meduza მოსკოვის სასამართლოს პრესსამსახურზე დაყრდნობით ავრცელებს. მათივე ცნობით, ეკატერინე კოტრიკაძესთან ერთად დაუსწრებლად შეუფარდეს პატიმრობა "დოჟდის" კიდევ ერთ ჟურნალისტს, ვალერია რატნიკოვას.

ჟურნალისტებს ბრალად ედებათ რუსული არმიის შესახებ პოლიტიკური სიძულვილით მოტივირებული "ყალბი ამბების" გავრცელება და "უცხოელი აგენტების" მოვალეობებისგან თავის არიდება.

რუსეთში სისხლის სამართლის საქმეები აღიძრა ასევე კოტრიკაძისა და რატნიკოვას კოლეგების, ანა მონგაიტის და "დოჟდის" მთავარი რედაქტორის, ტიხონ ძიადკოს წინააღმდეგ. რუსეთის სასამართლომ მონგაიტი 2025 წლის აგვისტოში დაუსწრებლად დააკავა.

2022 წელს კოტრიკაძეს რუსეთის იძულებით დატოვება მოუწია, რისი მიზეზიც რუსეთის შეიარაღებულ ძალებზე "ცრუ ინფორმაციის გავრცელება გახდა". Meduza-ს ტელეგრამ-არხის ცნობით, სექტემბერში კოტრიკაძე და რატნიკოვა ძებნილთა სიაში შეიყვანეს.

რუსული ჯარების მიერ უკრაინაში მასშტაბური შეჭრის შემდეგ, რუსეთში "დოჟდის" მაუწყებლობა დაიბლოკა, არხის ჟურნალისტები კი ქვეყნიდან გაიქცნენ და საზღვარგარეთ მუშაობას აგრძელებენ. 2025 წელს რუსეთმა ტელეკომპანია "დოჟდი" უცხოური ინტერესების გამტარებელ მედიად გამოაცხადა.