რუსეთის საგარეო საქმეთა მინისტრი სერგეი ლავროვი ოკუპირებული აფხაზეთისა და სამხრეთ ოსეთის, საგარეო საქმეთა მინისტრებს შეხვდა და დაარწმუნა ისინი, რომ მოსკოვი გააგრძელებს სოხუმისა და ცხინვალის დახმარებას "უსაფრთხოების, სტაბილურობისა და მდგრადი განვითარების უზრუნველყოფაში". ამის შესახებ ინფორმაციას "ეხო კავკაზა" ავრცელებს.

ლავროვმა ოკუპირებული აფხაზეთის ე.წ. საგარეო საქმეთა მინისტრს, ოლეგ ბარციცს გამარჯვებისა და დამოუკიდებლობის დღე მიულოცა, რომელიც აფხაზეთში 30 სექტემბერს აღინიშნება.

"ჩვენი მხრიდან, ჩვენ გავაგრძელებთ სუვერენული, დამოუკიდებელი აფხაზეთისთვის ყოვლისმომცველი დახმარების გაწევას მის განვითარებასა და უსაფრთხოებაში. ეს სრულად შეესაბამება ჩვენი ხალხების ინტერესებს", — აღნიშნა ლავროვმა.

რუსეთის საგარეო საქმეთა მინისტრმა შეხვედრაზე თქვა, რომ გააგრძელებს აფხაზეთის "დახმარებას უსაფრთხოების, სტაბილურობისა და მდგრადი განვითარების უზრუნველსაყოფად".

მისივე თქმით, განსაკუთრებული მნიშვნელობა აქვს სამხრეთ ოსეთის საერთაშორისო პოზიციის გაძლიერებას

"ჩვენი აზრით, განსაკუთრებული მნიშვნელობა აქვს სამხრეთ ოსეთის საერთაშორისო პოზიციის გაძლიერებას, საერთაშორისო საზოგადოებისთვის 2008 წლის მოვლენებისა და შემდგომი მოვლენების შესახებ სიმართლის მიწოდებას, ასევე თანამედროვე სამხრეთ ოსეთის შესაძლებლობების შესახებ საგარეო ურთიერთობების თვალსაზრისით", — განაცხადა ლავროვმა.

ლავროვმა 2008 წლის აგვისტოსა და სექტემბრის მოვლენებზე საუბრისას აღნიშნა, რომ "ამ მოვლენებმა საფუძველი ჩაუყარა თანამედროვე რუსეთ-სამხრეთ ოსეთის ურთიერთობებს, რომლებიც თანასწორობის, ინტეგრაციისა და ალიანსის პრინციპებს ეფუძნება".