"საერთაშორისო გამჭვირვალობა ბერლინი" საქართველოში სამოქალაქო საზოგადოების ორგანიზაციების წინააღმდეგ დაწყებული სისხლის სამართლის საქმეებთან დაკავშირებით განცხადებას ავრცელებს. ორგანიზაცია საბოტაჟის, უცხოურ ძალებთან კავშირისა და ფინანსურ დანაშაულების ბრალდებებს უსაფუძვლოდ მიიჩნევს და წერს, რომ "არსებობს რეალური რისკი, რომ დაკითხვებს მალე სამოქალაქო საზოგადოების ლიდერთა, მათ შორის ეკა გიგაურის, პოლიტიკურად მოტივირებული სისხლისსამართლებრივი დევნა მოჰყვეს."

"საერთაშორისო გამჭვირვალობა — ბერლინი ღრმად შეშფოთებულია საქართველოში სამოქალაქო საზოგადოების ორგანიზაციების დევნის გამწვავებით. უახლესი საფრთხის ფარგლებში, საერთაშორისო გამჭვირვალობა — საქართველოს აღმასრულებელი დირექტორი ეკა გიგაური სახელმწიფოს წინააღმდეგ მიმართულ სავარაუდო დანაშაულებზე მიმდინარე გამოძიების ფარგლებში დაიბარეს და დაკითხეს. ამ ბრალდებებს შესაძლოა 15 წლამდე თავისუფლების აღკვეთა მოჰყვეს.

საერთაშორისო გამჭვირვალობა ბრალდებებს — რომლებიც საბოტაჟს, უცხოურ ძალებთან კავშირსა და ფინანსურ დანაშაულებს მოიცავს — უსაფუძვლოდ მიიჩნევს და ამ პროცესს საქართველოში ერთ-ერთი წამყვანი ანტიკორუფციული ორგანიზაციის გაჩუმების მცდელობად აღიქვამს. არსებობს რეალური რისკი, რომ დაკითხვებს მალე სამოქალაქო საზოგადოების ლიდერთა, მათ შორის ეკა გიგაურის, პოლიტიკურად მოტივირებული სისხლისსამართლებრივი დევნა მოჰყვეს. საერთაშორისო გამჭვირვალობა — საქართველოს არასოდეს ჩაუტარებია საქმიანობა, რომელიც მსგავსი ბრალდებების დასაბუთებას გაამართლებდა. ეს არის შერჩევითი სამართლის, სისხლის სამართლის პროცესის ბოროტად გამოყენებისა და თვითნებური სამართალდამცავი პრაქტიკის ნათელი მაგალითი", — წერია გავრცელებულ განცხადებაში.

საერთაშორისო გამჭვირვალობის განცხადებაში ასევე აღნიშნულია, რომ ბოლო პერიოდში "საქართველოს ხელისუფლებამ განსხვავებული აზრის წინააღმდეგ კამპანია გააძლიერა" და "ეს ყველაფერი ავტორიტარულ სტრატეგიას წარმოადგენს, რომელიც მიზნად ისახავს სამოქალაქო საზოგადოების დასუსტებასა და დემოკრატიული კონტროლის ინსტიტუტების დაშლას."

"ეს ნაბიჯი სამოქალაქო საზოგადოების უფრო ფართო რეპრესიების ფონზე გადაიდგა. საერთაშორისო გამჭვირვალობა — საქართველო უკვე ორმაგ მონიტორინგს ექვემდებარება ე.წ. "უცხოური აგენტების შესახებ კანონის" და ახალი "გრანტების შესახებ კანონის" საფუძველზე. ეს ანტიდემოკრატიული ზომები არასამთავრობო ორგანიზაციების ლეგიტიმური საქმიანობის კრიმინალიზაციას ახდენს და დამოუკიდებელ ხმებს უცხო აგენტებად აცხადებს.

ბოლო თვეებში საქართველოს ხელისუფლებამ განსხვავებული აზრის წინააღმდეგ კამპანია გააძლიერა: დაიწყო პოლიტიკურად მოტივირებული სისხლის სამართლის საქმეები, მედიის შეზღუდვა, არასამთავრობო ორგანიზაციების საბანკო ანგარიშების გაყინვა და შიდა მონაცემების გადაცემის იძულება. ამ ახალი ტალღის ფარგლებში, არაერთი ორგანიზაცია — მათ შორის სამოქალაქო საზოგადოების ფონდი (CSF), სამართლიანი არჩევნებისა და დემოკრატიის საერთაშორისო საზოგადოება (ISFED) და სხვები — აღმოჩნდნენ საბოტაჟსა და სახელმწიფო გადატრიალებაში ბრალდებულნი, გაყინული ანგარიშებითა და სისხლის სამართლის საქმეებით. მრავალი ორგანიზაცია ახლა "უცხო აგენტების რეგისტრაციის კანონის" (FARA) და "გრანტების შესახებ კანონის" საფუძველზე ანტიკორუფციული ბიუროს მიერ მონიტორინგს ექვემდებარება. ეს ყველაფერი ავტორიტარულ სტრატეგიას წარმოადგენს, რომელიც მიზნად ისახავს სამოქალაქო საზოგადოების დასუსტებასა და დემოკრატიული კონტროლის ინსტიტუტების დაშლას", — წერია განცხადებაში.

საერთაშორისო გამჭვირვალობის თავმჯდომარე ფრანსუა ვალერიანი აცხადებს, რომ საერთაშორისო გამჭვირვალობა — საქართველოს დევნა დემოკრატიასა და კანონის უზენაესობაზე პირდაპირი თავდასხმაა.

"საერთაშორისო გამჭვირვალობა — საქართველოს დევნა პირდაპირი თავდასხმაა დემოკრატიასა და კანონის უზენაესობაზე. სამოქალაქო საზოგადოება საქართველოს მომავლის საფუძველია და არა საფრთხე მისი სუვერენიტეტისთვის. მოვუწოდებთ ხელისუფლებას, შეწყვიტოს შევიწროების კამპანია. საქართველოს ერთგულება დემოკრატიისადმი შეფასდება იმით, თუ როგორ მოექცევა იგი მათ, ვინც ანგარიშვალდებულებისა და კეთილსინდისიერებისთვის იბრძვის."

საერთაშორისო გამჭვირვალობა საქართველოს ხელისუფლებას მოუწოდებს:

• შეწყვიტოს სამოქალაქო საზოგადოების შევიწროება და დევნა;
  
  
• დაიცვას ასოციაციის, გამოხატვისა და სამართლიანი სასამართლოს უფლება;
  
  
• უზრუნველყოს სასამართლოს დამოუკიდებლობა და პატივი სცეს საერთაშორისო ადამიანის უფლებების ვალდებულებებს.