ჩეხეთის მთავრობამ სანქციების ეროვნულ სიას საქართველოს ხუთი მოქალაქე დაამატა. ამის შესახებ ინფორმაციას ჩეხური მედია ავრცელებს.

დასანქცირებულია ოცნების ხელისუფლების შინაგან საქმეთა მინისტრის მოადგილე ალექსანდრე დარახველიძე, სამი მოსამართლე, მათ შორის — ნინო გალუსტაშვილი და პროკურორი ლაშა კოტრიკაძე. ჩეხეთის საგარეო საქმეთა სამინისტროს განცხადებით, ისინი საქართველოში ბოლო ორი წლის განმავლობაში ჩატარებული საპროტესტო აქციების ძალადობრივ ჩახშობაზე არიან პასუხისმგებლები.

"სანქცირებულთა შორის არიან შინაგან საქმეთა მინისტრის მოადგილე ალექსანდრე დარახველიძე, რომელმაც დემონსტრანტების წინააღმდეგ ძალის გამოყენება ქართული უსაფრთხოების ძალების მხრიდან საჯაროდ დაიცვა. ასევე დასანქცირებულთა სიაში არიან მოსამართლე კობა ჩაგუნავა, ნინო გალუსტაშვილი, მიხეილ ჯინჯოლია და პროკურორი ლაშა კოტრიკაძეზე", — წერია გავრცელებულ განცხადებაში.

ჩეხეთის მთავრობამ შინაგან საქმეთა სამინისტროს სამ წარმომადგენელს აქციების დარბევაში მონაწილეობის გამო მიმდინარე წლის 30 იანვარს დაუწესა. სანქციები შეეხო შსს-ის განსაკუთრებულ დავალებათა დეპარტამენტის უფროსს, ზვიად ხარაზიშვილს (ხარება), მის მოადგილეს, მირზა კეზევაძეს და საპატრულო პოლიციის უფროსს, ვაჟა სირაძე.

18 სექტემებრს კი ჩეხეთმა საქართველოს დიპლომატიური და სამსახურებრივი პასპორტების მფლობელებისთვის ვიზის სავალდებულო რეჟიმი შემოიღო.

ამის შესახებ ინფორმაციას ჩეხეთის საგარეო საქმეთა მინისტრმა, იან ლიპავსკიმ გაავრცელა. მისი თქმით, მათი მხრიდან ეს ნაბიჯი საქართველოს მთავრობის მიერ ადამიანის უფლებების უპატივცემულობას, სამოქალაქო საზოგადოების დასუსტებასა და დემონსტრაციების ჩახშობას მოჰყვა.

"ჩემი ინიციატივის საფუძველზე, მთავრობამ საქართველოს დიპლომატიური და სამსახურებრივი პასპორტების მფლობელებისთვის ვიზის სავალდებულო რეჟიმის შემოღება დაამტკიცა. ეს არის ჩვენი პასუხი ადამიანის უფლებების უპატივცემულობაზე, დემონსტრაციების ჩახშობასა და სამოქალაქო საზოგადოების დასუსტებაზე. აღნიშნული ღონისძიება ვიზის გარეშე საქართველოს ოფიციალურ პირებთან კონტაქტს აჩერებს", — დაწერა იან ლიპავსკიმ.