ევროკავშირისა და 26 ქვეყნის საელჩოს წარმომადგენლები საერთო განცხადებას ავრცელებენ, სადაც აცხადებენ, რომ არც ერთი პოლიტიკური პარტიის მომხრეები არ არიან და სიცრუეს შეესაბამება მათი მხრიდან ძალადობრივი აქტის მოწოდება. განცხადებაში მათ ასევე დასძინეს, რომ დიპლომატებისთვის მუშაობის ნორმალური ნაწილია მოქალაქეებთან და ოპოზიციური პარტიების წარმომადგენლებთან შეხვედრა და ეს ქმედება ვენის კონვენციას სრულიად შეესაბამება.

"მტკიცედ უარვყოფთ უსაფუძვლო და ზიანის მომტან ბრალდებებს საქართველოში ზოგიერთი დიპლომატიური მისიის როლისა და საქმიანობის შესახებ. ასეთ დეზინფორმაციას შეცდომაში შეჰყავს საზოგადოება და ძირს უთხრის ჩვენი დიპლომატიური მისიების მიერ მათი მოვალეობების შესრულების შესაძლებლობას.

დიპლომატებისთვის, ფართო სპექტრის წარმომადგენლებთან — მთავრობასთან, ოპოზიციასთან, სამოქალაქო საზოგადოებასთან და ზოგადად მოქალაქეებთან — შეხვედრა დიპლომატიური მუშაობის ნორმალური ნაწილია და ვენის კონვენციას სრულად შეესაბამება. ჩვენ არცერთ კონკრეტულ პოლიტიკურ პარტიას არ ვუჭერთ მხარს და განცხადებები ჩვენს მიერ ძალადობისა და ექსტრემიზმის მხარდაჭერის შესახებ უბრალოდ სიმართლე არ არის. სინამდვილეში, ჩვენ ყველა აქტორს მოვუწოდებთ, რომ უარი თქვან ძალადობის ნებისმიერი ფორმაზე და დაგმონ იგი.

მოვუწოდებთ ყველა პოლიტიკურ ლიდერს, თავი შეიკავონ დაპირისპირების გამომწვევი რიტორიკისგან და ძალისხმევა დაძაბულობის განმუხტვისკენ მიმართონ," — ვკითხულობთ განცხადებაში.

ცნობისთვის, შალვა პაპუაშვილის განცხადებით, 4 ოქტომბრის აქციაზე ძალადობის ფაქტების დაფიქსირების შემთხვევაში პასუხისმგებლობას ევროკომისიას აკისრებს. პაპუაშვილმა ასევე დასძინა, რომ ის "ყურს არ უჯერებდა", როდესაც მოისმინა ევროკომისიის სპიკერის კომენტარი 4 ოქტომბერთან დაკავშირებით. ევროკომისიის სპიკერმა საგარეო ურთიერთობათა და უსაფრთხოების პოლიტიკის საკითხებში, ანიტა ჰიპერმა 4 ოქტომბრის აქციაზე "ფორმულასთან" საუბრისას განაცხადა, რომ ქართველ ხალხს სოლიდარობას უცხადებს.

შემდეგ პაპუაშვილმა პაველ ჰერჩინსკისზე განაცხადა, რომ "ასეთი "აწეული ტონით" საუბარს ქართველ ჟურნალისტებთან არავინ კადრულობს და მოუწოდებს ელჩს, რომ "ტონს დაუწიოს". ტელეკომპანია "იმედის" ჟურნალისტის უკმაყოფილება გამოიწვია იმან, რომ, როგორც თავად აცხადებენ, "ქრონიკამ" 2 კვირის წინ გაგზავნა კითხვა ევროკავშირის ელჩისა და აქტივისტ ანანო ცინცაბაძის ერთობლივ ფოტოსთან დაკავშირებით, რაზეც პასუხი არ მიუღიათ.