დღეს კოალიცია ძლიერი საქართველო — ლელოს თავმჯდომარე, მამუკა ხაზარაძე, თბილისის მერობის საერთო კანდიდატი, ირაკლი კუპრაძე და საარჩევნო შტაბის ხელმძღვანელი, თაზო დათუნაშვილი, ბრიუსელის მერმა ფილიპ კლოზიმ მიიღო.

კოალიციის მიერ გავრცელებულ ინფორმაციაში ნათქვამია, რომ ორმხრივ შეხვედრაზე, თბილისი-ბრიუსელის სამომავლო პარტნიორობის დეტალები განხილეს, როგორც კულტურული, ისე ეკონომიკური თანამშრომლობის ფარგლებში, რაც ერთობლივი ინფრასტრუქტურული და საგანმანათლებლო პროექტების დაგეგმვა-განხორციელებას გულისხმობს.

"ბრიუსელის მერს სტუმრებმა, საქართველოში წინასაარჩევნოდ არსებული მძიმე პოლიტიკური ვითარება გააცნეს და ფილიპ კლოზიმ თბილისის მერობის ერთიან კანდიდატს, ადგილობრივი თვითმმართველობის არჩევნებში სრული მხარდაჭერა გამოუცხადა", — წერს კოალიცია.

"ჩვენ დღეს შევხვდით თბილისის მერობის კანდიდატს, ირაკლი კუპრაძეს. მე მინდა მას გამოვუცხადო სრული მხარდაჭერა, რადგან ჩვენ გვაკავშირებს ის საერთო ევროპული ღირებულები, რაც ძალიან მნიშვნელოვანია ჩემთვის, როგორც ევროპის დედაქალაქის მერისთვის", — აცხადებს ფილიპ კლოზი.

შეხვედრის შემდეგ ირაკლი კუპრაძე სოციალურ ქსელში წერს, რომ ბრიუსელის მერთან ერთად თბილისი-ბრიუსელის სამომავლო პარტნიორობის დეტალებზე ისაუბრეს.

"შეხვედრაზე ბევრი ვისაუბრეთ თბილისი - ბრიუსელის სამომავლო პარტნიორობის დეტალებზე, როგორც კულტურული, ისე ეკონომიკური თანამშრომლობის ფარგლებში, რაც ერთობლივი ინფრასტრუქტურული და საგანმანათლებლო პროექტების დაგეგმვა - განხორციელებას გულისხმობს.

სამწუხაროა, რომ თბილისის რუსი მერი არ ჩამოდის ევროპულ დედაქალაქებში და თავის კოლეგებს ჩვენი თბილისის განვითარებაზე არ ესაუბრება.

კალაძე ვერ ხვდება საქართველოს მოქალაქეებს! კალაძე ვერ ხვდება ევროპელ კოლეგებს! ეს ყველაფერი კი უკან ხევს და ქართველ ხალხს იზოლაციაში აქცევს", — წერს კუპრაძე.