თბილისის მერი კახა კალაძე ამბობს, რომ რამზან კადიროვის მეგობრის, MMA-ს ჩეჩენი მებრძოლის, ხამზატ ჩიმაევისთვის Ferari მას არ უჩუქებია, საბა მიქავამ აჩუქა, რომელიც ავტოსალონ "ფორცა თბილისის" მფლობელია. წალენჯიხაშიც მისი მანქანით წავიდა და თავადაც მიქავას Ferari-ზე იჯდა 10-15 წუთით.

"[ხამზათ ჩიმაევისთვის] Ferari მე არ მიჩუქებია. გულწრფელად გეტყვით, რაც მოხდა სინამდვილეში. გეცოდინებათ საბა მიკავა, რომელიც ავტოსალონ "ფორცა თბილისის" მფლობელია. სხვათა შორის, წალენჯიხაში სწორედ მისი კუთვნილი ავტომანქანით ვიყავით. ადამიანმა იშრომა, იწვალა, გაუჩნდა შესაძლებლობები, რომ ეს ლურჯი Ferari ეყიდა. მე სულ რაღაც 10-15 წუთი დავჯექი მის საჭესთან და დაიწყეთ საუბარი, რომ მე მეკუთვნის. ახლა კი, იწვალა, თავის მეგობრებთან ერთად რაღაცები შეაგროვა, რომ ჩიმაევისთვის ავტომანქანა ეჩუქებინა და ყველა ამბობს, რომ თითქოს მე ვაჩუქე. ბიჭმა ამდენი იწვალა, ყველაფერზე რაც მისთვის მნიშვნელოვანი იყო, Ferari-ს ყოლაზე თქვეს, კალაძისააო. მანქანა აჩუქა, კახამ აჩუქაო, გამოვიდა და თქვა ჩემს ბედს", ­— თქვა კახა კალაძემ.

ცნობისათვის, ჩეჩნეთის ლიდერის, რამზან კადიროვის მეგობარ, MMA-ს ჩეჩენ მებრძოლს, ხამზათ ჩიმაევს თბილისში Ferrari აჩუქეს. საჩუქრის გადაცემის ამსახველ ვიდეო 16 სექტემბერს თბილისის მერმა კახა კალაძემ სოციალურ ქსელში გამოაქვეყნა და დაწერა: "კეთილი იყოს შენი თბილისში ჩამოსვლა ჩემი ძმაო". გავრცელებული ვიდეოში კახა კალაძეც ჩანს. დღეს კალაძემ განაცხადა, რომ Ferrari ჩიმაევს საბა მიქავამ აჩუქა.

განახლება:

საბა მიქავამ 20 სექტემბერს "ტვ პირველის" ეთერში გასულ რეპორტაჟში განაცხადა, რომ ნამდვილად მან აჩუქა ხამზათ ჩიმაევს Ferrari. ამას გარდა, დაადასტურა მედიაში გავრცელებული ინფორმაცია იმის შესახებ, რომ ის კანონიერი ქურდის, ტარიელ მიქავას (კემე) შვილია და მამამისი 2002 წელს გარდაიცვალა.

MMA-ს ჩეჩენი მებრძოლისთვის ნაჩუქარი სპორტული ავტომანქანის ღირებულება დაახლოებით $400 000-ია და მილიონ ლარს აღემატება.